Silleda, 22 de novembro do 2018 – O xoven piloto silledense Christian Costoya Sanabria parte hoxe cara a Brasil para disputar na cidade de Joao Pessoa –no distrito de Paraíba- a Rotax Gran Final, o torneo mundial de karts no que representará a España.
Con tan só 8 anos será o máis novo da categoría (compite na sección Micro, de 8 a 11 anos), na que se medirá xunto a outros 35 corredores de outros tantos países. Logo de pechar un ano brillante de títulos, Costoya obtivo o pase para o mundial de karts logo de proclamarse campión en Portugal.
Cristian chegará mañá a Joao Pessoa, ao norte do país, para iniciar o sábado 24 as verificacións administrativas. O domingo 25 terá lugar o sorteo de chasis e motores e o luns 26 será o primeiro día de saída á pista para realizar adestramentos, repetindo nas xornadas posteriores. O xoves 29 terá lugar a clasificación de saída e xa o sábado 1 de decembro chegará a gran cita.
Esta será o primeiro mundial para Christian que acudirá acompañado ,entre outros, polo seu pai, Marcos Costoya, que advirte que o piloto está xa con ganas de vivir a que será unha das experiencias máis importantes da súa exitosa traxectoria.
Dende o Concello, o alcalde, Manuel Cuiña, e a concelleira de Deportes, Ana Luisa González, indican que a participación de Christian, cunha prometedeora traxectoria supón todo un orgullo para Silleda.
Apoio ao deporte individual
Por outra banda, e á vista de casos coma o de Christian ou o de Diego Iglesias, que vén de triunfar tamén coa doma clásica no Salón Internacional do Cabalo de Sevilla, o goberno municipal está xa a traballar na redacción dunhas bases para axudar economicamente a deportistas individuais. “Temos máis casos e somos conscientes do esforzo que supón para eles acudir a competicións por iso ademais das axudas para entidades vemos necesario convocar outras subvencións para os deportistas silledenses que compiten a nivel individual”, engade a concelleira.