O Pino, 5 de outubro do 2020 – O Psoe de O Pino ven de denunciar que as obras de arranxo do campo de fútbol do Lameiro fanse cunha modificación de crédito sen que estea xustificada a urxencia.
Os socialistas explican que no último pleno PP e BNG aprobaron un expediente de modificación de crédito por valor de 176.000 euros, destinados a acondicionar o campo de fútbol do Lameiro. Utilizando como único argumento a necesidade doutro campo de fútbol para a SD o Pino.
O Psoe insistiu no debate en que “os motivos expostos non xustifican a urxencia, nesta época de pandemia non está claro que a competición comece, ademais na localidade xa dispoñemos doutro campo de fútbol, o de Reboredo, totalmente acondicionado e a enteira disposición da SD o Pino”.
Acusan ao alcalde de irresponsable
O Grupo Municipal Socialista acusa ao Alcalde de irresponsable e de promover obras de xeito totalmente electoralista. Denuncian que ante a actual situación de crise sanitaria, social e económica non é o momento de promover este tipo de obras, cando estas necesidades xa están cubertas, e que pola contra hai outras demandas máis urxentes “agora o que toca é o gasto social, temos moitos negocios vinculados a hostalería que igual teñen que pechar, carecemos dun centro de día, non hai saneamento no rural, o que si hai é campos de fútbol de sobra” apuntan.