Bisbarra, 3 de marzo do 2021 – O Ministerio de Cultura acorda coa Deputación impulsar a dixitalización dos arquivos municipais da provincia.
O presidente provincial, Valentín Valentín González Formoso, mantivo unha reunión en Madrid co ministro de Cultura e Deporte, José Manuel Rodríguez Uribes. No encontro presentoulle un plan piloto para preservar os arquivos históricos dos concellos da Coruña.
Iniciativa ambiciosa
Segundo explicou o presidente da Deputación trataríase dunha iniciativa “ambiciosa e pioneira en España”, coa que a institución provincial pretende estender o Plan de Dixitalización, que desde hai máis dunha década leva realizando cos fondos do seu propio Arquivo Provincial, aos 93 concellos coruñeses. O plan comezaría por aqueles máis pequenos, con menores recursos técnicos e económicos para conservar e inventariar o seu patrimonio documental e levar a cabo este tipo de tarefas.
“Os documentos que se gardan nos arquivos municipais son unha peza fundamental da memoria colectiva da provincia da Coruña e de Galicia e constitúen unha fonte de enorme valor para coñecer o noso pasado”, afirmou González Formoso, que explicou que o Plan de Dixitalización de Arquivos Municipais non só evitará o deterioro ou perda de documentación de gran valor histórico e diminuirá o espazo físico que as administracións locais precisan para conservar os documentos en condicións adecuadas, “senón que universalizará o acceso aos documentos que custodian os arquivos municipais da provincia, facéndoos máis accesibles para os investigadores e para a cidadanía en xeral”.
Formoso destacou o “carácter pioneiro” do proxecto, no que a Deputación se encargaría da dixitalización dos diferentes arquivos municipais da provincia da Coruña, devolvendo posteriormente os documentos orixinais aos concellos para a súa custodia e facilitando unha copia dixital dos mesmos, ao tempo que se crearía un gran repositorio provincial online para permitir a consulta dos documentos.
Valentín González Formoso agradeceu o “interese mostrado polo ministro Rodríguez Uribes nos detalles do proxecto” así como a disposición do Ministerio de Cultura a estudar a súa colaboración neste ambicioso Plan de Dixitalización de Arquivos Municipais, que debido á súa complexidade e ao importante volumen de documentos que abarca se desenvolvería en varias anualidades e requerirá da cooperación económica, técnica e administrativa de distintas administracións, polo que ademáis do Ministerio de Cultura, o goberno provincial trasladará o proxecto tamén á Consellería de Cultura da Xunta de Galicia.