Compostela, 14 de marzo do 2022 – A Asociación Cultural O Galo organiza este mércores, no Museo do Pobo Galego, unha palestra sobre as “festas de mouros e cristiáns en galiza e terras veciñas”.
A cita comeza as sete da tarde no salón de actos do Museo do Pobo Galego. No acto a AC O Galo proxectará imaxes das principais festas deste tipo que se celebran en Galiza e no norte de Portugal.
O profesor e doutor González Reboredo explicará as súas orixes, evolución e as semellanzas que posúen con outras festas parellas que teñen lugar preto da fronteira co país luso. Tamén lembrará os datos que se teñen sobre unha que se desenvolvía hai anos en Compostela.
para participar é preciso anotarse en comunicacion@ogalo.gal antes do 16 de marzo as 13h e indicar o nome, os dous apelidos e o número de teléfono de cada unha das persoas que acodan á palestra. Nela será obrigatoio o uso de mascarilla.
Mouros e cristiáns en Galicia
En Galicia as representacións populares coa temática dun enfrontamento de mouros e cristiáns son moi poucas e pouco coñecidas, ou ignoradas polo gran público.
O mesmo sucede, ou sucedía hai anos, coas de León e Asturias, pero menos no norte de Portugal, onde unha tradición con casos moi puntuais, aínda que tan importantes como o Auto da Floripes (As Neves- Viana do Castelo), manifesta unha forma moi singular desta variante festiva que ten o seu antecedente escrito no libro IV do Codex Calixtinus, coñecida obra que cristaliza a tradición xacobea no século XII.
Desde a AC O Galo suliñan, das vixentes agora en Galicia, tres en Laza, unha na Saínza-Rairiz de Veiga e outras dúas na Franqueira-A Cañiza e Mouriscados -Mondariz. En xeral as representacións galegas, sacado casos como A Saínza, son moi sinxelas, ás veces reducidas a un debate entre un mouro e un cristián.