Ames, 19 de novembro do 2020 – O alcalde de Ames, José Miñones, mantivo unha xuntanza por videoconferencia coa Conselleira de Emprego e Igualdade, María Jesús Lorenzana, na que avaliaron os programas do departamento autonómico dirixidos a impulsar a formación para o emprego.
O Concello de Ames vén de resultar beneficiario dun obradoiro e dun programa integrado de emprego, dúas iniciativas que ofrecen formación ás persoas desempregadas. A Xunta concedeu ao Concello unha axuda de 346.946 euros para a posta en marcha dun obradoiro dual de emprego sobre o Camiño de Santiago, no que participarán 20 alumnos e alumnas. Doutro lado, Ames, xunto con Brión, tamén resultou beneficiario dun Programa Integrado de Emprego (PIE) específico para mulleres con 100 prazas. A axuda do Goberno galego ascendeu neste caso a preto de 215.000 euros.
Colaboración estreita
A conselleira de Emprego e Igualdade, María Jesús Lorenzana, resaltou na reunión a importancia da colaboración entre administracións para impulsar entre todos o emprego local. Neste senso, agardou seguir estreitando a colaboración con Ames como ata o de agora. En 2019, esta Administración local recibiu o apoio da Consellería de Emprego e Igualdade a través de diferentes liñas de axudas que sumaron máis de 700.000 euros.
Na reunión participaron a concelleira de Promoción Económica, Ana Belén Paz, e o Axente de Desenvolvemento Local de Ames, Juan Carlos Carreja. Paz destaca “a importancia desta formación que ten como obxectivo mellorar as posibilidades de acceso ao emprego a través da formación dos participantes”. Engade a concelleira que “o obxectivo desta nova edición é a mellora da empregabilidade e a cualificación laboral das participantes, nunha situación coma actual de especial dificultade e que afecta en maior medida a colectivos vulnerables, integrados fundamentalmente por mulleres”.
Programa integrado de emprego de Ames e Brión
O alcalde de Ames, Jose Miñones, destacou que os concellos de Ames e de Brión van poñer en marcha unha nova edición do programa integrado de emprego, que está dirixido a 100 mulleres desempregadas, a formación orientarase ao traballo nos sectores socio sanitario, comercial e de atención ao público, ocio e tempo libre, turismo, limpeza, hostalería e manexo de maquinaria. O programa comezará a desenvolverse nas vindeiras semanas e rematará en novembro do 2021. Ademais, as participantes recibirán formación transversal en novas tecnoloxías e idiomas, técnicas de busca de emprego, marca persoal, comunicación, habilidades sociais e intelixencia emocional e emprendemento. Tamén contarán con titorías persoais que as acompañarán á hora de buscar emprego.
Para poder participar, as interesadas deben ter a súa residencia nos concellos de Ames ou Brión e estar inscritas como desempregadas na oficina de emprego. Para solicitar máis información do proceso de inscrición e do funcionamento do programa hai que cubrir o formulario dispoñible nas webs municipais. A partir de aí, os axentes de promoción económica dos concellos de Ames e Brión, poranse en contacto coas interesadas.
