Noia, 29 de decembro do 2018 – O proceso de selección de tres novos axentes para a Policía Local de Noia sofre un parón coa recusación de parte do tribunal.
O concello decidiu suspender todo o procedemento de provisión de novas prazas na Policía Local. Esta oferta de emprego estaba incluída nas previstas para o ano 2018. O concello suspende tamén o exame previsto para o venres día catro. Este contratempo fai moi difícil a incorporación de novos axentes no 2019 xa que os que aprobaran deberían entrar na Academia Galega de Seguridade a primeiros de ano e rematar un curso de 9 meses.
A suspensión está motivada pola presentación, o pasado xoves, dun escrito de recusación contra tres membros do Tribunal de selección. A recusación contra Antonio Blanco García, Francisco Fernández Arufe e Francisco Luís Lorenzo Rodríguez reclama tamén a suspensión da tramitación do procedemento en tanto que non sexa resolta esta solicitude polo superior xerárquico dos recusados.
