Noia, 11 de febreiro do 2020 – Unha rama de máis de 3000 kilos caeu este luns dun dos magnolios dos xardíns Felipe de Castro en Noia.
Afortunadamente o incidente non causou ningún dano. Técnicos municipais procederon a pechar esa zona dos xardíns Felipe de Castro e a retirar a rama caída.
A concelleira de Parques e Xardíns, Mariola López Cierto, fixo un chamamento á responsabilidade da veciñanza para que “ninguén se salte a zona restrinxida, cando menos mentres duren os traballos para asegurar que o magnolio está en boas condicións e está equilibrado”.
López Cierto explica que “estamos á espera dun informe para coñecer as causas do acontecido pero todo parece indicar que a caída debeuse a unha combinación entre a avanzada idade do magnolio e o peso da propia rama. De todos modos, estaremos pendentes do informe, que fará unha empresa especializada neste tipo de árbores e que será tamén a encargada de facer as actuacións pertinentes de desramaxe e tratamento do magnolio, xa que os operarios municipais limitáronse hoxe a retirar a rama caída”.
