Noia, 9 de abril do 2018 – Preto de medio cento de persoas, na súa gran maioría apicultores/as, asistiron á charla informativa sobre o control da vespa velutina celebrada no salón de plenos do Concello de Noia.
A charla foi impartida polo xefe do servizo de Protección Civil de Noia, Eduardo Moledo, e a concelleira de Medio Ambiente e Protección Civil, Ángela Neri Arufe. No encontro os responsables municipais aproveitaron para presentar a campaña de prevención contra as raíñas de velutina que vai levar a cabo o Concello e intercambiar opinións cos numerosos apicultores presentes, que explicaron os graves problemas que esta especie invasora está a causar tanto nas súas colmeas coma nas árbores froiteiros. Todos coincidiron na idoneidade da campaña xa que coincide co momento no que as raíñas de velutina comezan a conformar os seus niños primarios.
Según a concelleira Ángela Neri “Isto é un plan de prevención sobre as raíñas, para tentar que non se reproduzan máis, a clave agora é que non haxa niño. E para iso hai que cazar á raíña. Cada raíña que collamos agora será un niño menos”. Unha medida que aplaudiron os presentes, quen chamaron a atención sobre a necesidade de que non só Noia faga este tipo de actuacións preventivas pois, como sinalaron, as velutinas non entenden de fronteiras municipais. Ángela Neri comprometeuse, en resposta a esta petición, a dar traslado da iniciativa aos municipios veciños para tratar de implicalos na campaña, “así como aos colexios, para ensinarlles tamén aos nenos e nenas a elaborar trampas caseiras”.
Reparto de trampas
Pola súa banda, Eduardo Moledo, explicou que o Concello de Noia adquiriu 200 trampas, modelo “Vespa Catch”, e 600 atraentes para loitar contra a velutina. Unhas trampas que “doadas de colocar, de cor amarela, que as atrae moito, e cun líquido atraente que maximiza a captura de velutinas sen afectar ás abellas”. O Protección Civil de Noia tamén explicou como colocar as trampas cun gancho que trae a propia “Vespa-Catch” e como elaborar o líquido para atraer ás vespas: 200 cl de auga, 50 gramos de azucre e 10 ml de atraente.
A intención de Protección Civil é de facer un seguimento a todas as trampas que se coloquen polo municipio, para valorar a súa eficacia, polo que solicitou a colaboración da veciñanza para. Os presentes xa levaron numerosas trampas, azucre e líquido atraente para comezar dende xa a colocalas. Para iso tiveron que deixar os seus datos de contacto e indicar onde ían colocar cada unha delas.
A “Vespa Catch” é un modelo francés de trampa simple e eficaz, que se coloca con facilidade grazas a un gancho incluído na súa confección. O atraente é unha solución completamente natural e sen insecticida, baseado en extractos vexetais. Segundo os cálculos da empresa fabricante, Véto-pharma, é quen de capturar unhas 13 velutinas en tan só 48 horas, chegando aos 87 exemplares en 8 días, fronte as 27 que se capturan de media con trampas artesanais.