Bisbarra, 19 de marzo do 2024 – O auditorio Afonso Eanes do Cotón de Negreira acolle este vindeiro venres a obra “O dragón de ouro” de Sarabela Teatro que ven de estreala en Ourense.
A peza é unha tradución ao galego de Catuxa Pato da obra do Aleman Roland Schimmelpfenning, que acudiu á estrea en Ourense. Baixo a dirección de Ánxeles Cuña, cinco actores interpretarán en Negreira a máis de vinte personaxes en 48 escenas.
Trátase dun traballo no que “se mesturan texturas, voces, situacións fabulosas que provocan unha teatralidade pouco común”. Unha posta en escena que conta cun “equipo entregado e talentoso que con humildade, xenerosidade e entrega dá o mellor de si para habitar este Dragón de ouro que arela comunicarse coa súa comunidade”.
O dragón de ouro
Unha noite, nun edificio de varios pisos, nalgún lugar de Europa: un mozo chinés sofre unha forte dor de moas na cociña dun restaurante asiático de comida rápida. Non ten permiso de residencia nin atopa a súa irmá desaparecida.
A obra aborda temas candentes no debate social como a inmigración ilegal e a prostitución forzada. Con humor fino e unindo fantasía e realidade. Posta en escena cun equipo xeneroso e entregado que dá o mellor de si para habitar un universo fascinante, único.
