Bisbarra, 12 de xaneiro do 2023 – O concello de Negreira celebrou o primeiro pleno do ano, aprobando partidas para abono de facturas e alongando a suspensión de pagos de algunhas taxas.
O pleno comezou cun minuto de silencia na honra do que fora alcalde do concello, José Blanco Pazos, e de José Silva Lens, veciño atopado morto recentemente. En este punto o alcalde, Manuel Ángel Leis, condenou o feito de que soaran petardos no enterro do ex alcalde por ser inaceptable ese comportamento “fose o ex-acalde ou fose calquera outra persoa, pois para nós non teñen ningún tipo de lóxica, nin de sentido, nin de aceptación”.
A continuación a corporación aprobou, de xeito provisional, por unanimidade a modificación da Ordenanza fiscal reguladora do Imposto sobre o incremento de valor dos terreos de natureza urbana, coa exposición pública de 30 días.
Coa abstención do Partido Popular e o apoio do grupo de goberno, Psoe, saíu adiante un recoñecemento extraxudicial de crédito de algo máis de oitocentos mil euros. Esta cantidade esta destinada a abonar facturas pendentes do ano anterior. A oposición foi moi crítica co aumento do gasto nos últimos exercicios.
Pola súa banda o alcalde respondeu que “moitas das facturas corresponden a gastos enerxéticos como con Naturgy, ou mesmo da xestión dos residuos con Sogama”, e asegurou que os provedores locais “están cobrando practicamente nos prazos que marca a lei, aínda que poderían quedar algunhas facturas por esgotamento de crédito en determinadas partidas”..
Xa por vía de urxencia o pleno municipal aprobou unha proposta do Goberno municipal para prorrogar a suspensión do pago de dúas taxas municipais, cuxa exención fora aprobada no 2021. Trátase das relativas á expedición de documentos administrativos e pola licenza de apertura de establecementos ou pola actividade de control posterior daquelas actividades sometidas a comunicación previa.