Touro, 18 de maio do 2018 – A Asociación Aldea Viva denuncia que o río Ameneiro Lamas usado pola aldea de Santaia, que non se contaminara durante a antiga explotación, esta afectado polos depósitos de materiais contaminantes que se fan na actualidade.
Santaia usaba para regadío de cultivos e hortas, abastecemento do gando e para un lavadoiro público as augas do río. A veciñanza ao comprobar a contaminación, provocada polos desbordes dos depósitos de residuos, que afecta ao Ameneiro Lamas viuse obrigada a desviar o caudal fora da aldea para non prexudicar os terreos.
Aldea Viva cursou denuncia á Consellería de Medio Ambiente solicitando o inicio dun procedemento de responsabilidade medioambiental ao abeiro da Lei 26/2007 contra o propietario da mina, Explotaciones Gallegas S.L., habida conta da relación de causalidade entre a contaminación deste río e as actuacións que o propietario realizou nos terreos mineiros para a creación de accesos ao futuro polígono empresarial, movementos de terras e incluso de materiais da balsa de lodos do proceso mineiro. A Asociación descoñece qué proxectos de obras e autorizacións en zonas contaminadas ampararon os traballos e se o concello de Touro tomou conta das actuacións e das consecuencias, dándose unha evidente falla de implementación de medidas de prevención, evitación e reparación.
Currículum dudoso da máxima accionista de Cobre San Rafael
Neste ano Explotaciones Gallegas ten incoados xa dous expedientes sancionadores por vertidos ao dominio público e afectación à calidade das augas, a instancia de denuncias de Aldea Viva. A asociación lamenta que teñan que ser os colectivos e veciñanza quen estean a actuar ante o desleixo das administracións.
