Ames, 12 de febreiro do 2021 – O Concello de Ames, en colaboración coa Deputación da Coruña, vai realizar obras de mellora térmica da cuberta e fachadas da escola infantil municipal O Bosque, en Bertamiráns.
A actuación ten un orzamento de 78.920,40 euros, dos que 52.000 euros corresponden á Deputación e 26.920,40 euros ao concello de Ames. Esta semana o Servizo de Patrimonio e Contratación da Deputación aprobou o proxecto técnico que será levado ao pleno municipal para que posteriormente sexa licitado polo ente provincial.
Problemas de filtracións
A escola infantil O Bosque, en Bertamiráns, presenta na actualidade problemas de estanqueidade en cuberta así como filtracións de auga pola súa base nas zonas onde se atopa a rentes co pavimento existente.
A finalidade das obras é deter o deterioro ao que se atopa sometida a cuberta da edificación existente, mellorando a eficiencia enerxética da mesma. Ao mesmo tempo, plantéxase unha nova envolvente que mellore o comportamento térmico do mesmo. Terá lugar un leve aumento da altura da cuberta dado a solución proposta, respectando a normativa vixente e os parámetros que establece o PXOM do Concello de Ames.
O concelleiro de Educación, David Santomil, explica que “o obxectivo destas obras é acondicionar a cuberta e mailas fachadas desta escola infantil municipal e ao mesmo tempo mellorar tamén ás condicións térmicas do edificio. Estas obras poderanse realizar grazas á colaboración da Deputación da Coruña, que achega arredor do 65% do importe do orzamento do proxecto. O 35% restante do orzamento achegarao o Concello de Ames a través de fondos propios no Orzamento 2021”.
