Melide, 2 de maio do 2022 – Jose Manuel Pérez, alcalde de Melide e Xosé Igrexas, concelleiro de promoción económica, inauguraron a exposición “30 anos de doces”.
“30 anos de doces” está situada no cantón de San Roque e forma parte do programa do 30.º aniversario da Festa do Melindre e a repostaría tradicional.
Esta exposición é unha mostra composta por vinte paneis realizados especialmente para o XXX aniversario. Falan da repostaría tradicional de Melide e a historia da Festa do Melindre, con imaxes dos últimos trinta anos da feira (venda, parte comercial, stands), a festa (lecer), os produtos (os tradicionais melindres, ricos e amendoados), os embaixadores/as, etc.
Os paneis están situados en cinco cubos. O primeiro deles está dedicado ás orixes; o segundo leva por título os doces e os oficios; o cubo tres lembra aos embaixadores e aos pregoeiros do Melindre; o cubo catro dedícase á feira asociada a Festa do Melindre e finalmente o quinto cubo dedícase á festa propiamente dita.
A XXX edición da Festa do Melindre celébrase o vindeiro fin de semana, 7 e 8 de maio, polo que será un bo momento para disfrutar dos doces, das actividades e da música ademais de ver a exposición mencionada.
