Melide, 4 de xullo do 2022 – O concello de Melide outorgou este ano a Medalla de Ouro das Festas de san Pedro aos colectivos que estiveron na primeira liña na loita contra a Covid.
Os colectivos distinguidos coa medalla comprenden o persoal da área sanitaria, o persoal de dependencia e axuda a domicilio, o de obras e servizos, as forzas de seguridade, o profesorado e alumnado dos centros de ensino, os traballadores do sector privado máis afectados pola carga de traballo da pandemia e os servizos sociais municipais.
A entrega de medallas realizouse nun acto institucional que tivo lugar na Casa do Concello. Melide fixo pública ademais unha declaración institucional con este motivo. A mesma foi asinada polos representantes de todos os grupos políticos con representación municipal.
A declaración sinala como galardoados polas medallas deste ano ao persoal sanitario da área sanitaria melidá, así como o persoal de coidados, axuda a domicilio e dependencia municipal e das residencias da terceira idade de Melide. Recoñece tamén o persoal de obras e servizos polos seus labores de desinfección de espazos públicos, así como as forzas e corpos de seguridade como a Policía Local, Protección Civil e mais a Garda Civil. As medallas premian tamén o traballo, recolle a declaración, do persoal docente e alumnado dos centros educativos, e das e os dependentes de supermercados, farmacias e comercios, así como perruquería, servizos funerarios, medios de comunicación, estancos e quioscos. Por último, resulta tamén galardoado o equipo técnico dos servizos sociais municipais.
O Concello recoñece a todos estes colectivos a súa entrega e especial exposición aos efectos da pandemia. Ante o elevado número de persoas recoñecidas, a imposición de medallas non se levou a cabo a título individual. Na entrada do Concello situouse unha medalla honorífica e unha placa coa relación de galardoados.