Melide, 30 de agosto do 2019 – Un ano máis a Asociación de Empresarios Terra de Melide – Centro Comercial Aberto (Asetem – CCA), organiza a campaña do Bono Asetem, que nesta edición repartirá case 1.000 euros en vales de compra co obxectivo de facilitar o comezo do curso as familias da comarca.
Como novidade esta edición os empresarios de Melide deseñaron dúas modalidades de campaña, unha para familias numerosas e outra para todo o resto.
Familias numerosas
Entregarase un vale de 10 euros para familias numerosas por compras iguais ou superiores a 60 euros en calquera dos establecementos asociados, aínda que iso si, só por compras en artigos relacionados exclusivamente coa volta ao cole. É dicir, roupa, calzado, material escolar e deportivo, ou libros por exemplo. Unha vez que se realice o gasto (que pode ser un único tícket de 60 euros ou varios que sumen dito importe), os interesados poderán recoller o bono desconto de 10 euros en Asetem presentando o tícket de compra e o carné correspondente de familia numerosa.
Familias non numerosas
Entregarase un vale de 6 euros para todas aquelas familias que fagan as súas compras en calquera dos establecementos asociados, por compras iguais ou superiores a 60 euros e tamén única e exclusivamente en artigos relacionados coa volta ao cole. Unha vez feito o gasto deberán recoller o bono desconto de 6 euros en Asetem presentando o tícket de compra e o DNI.
En calquera das dúas modalidades só será entregado un vale desconto por familia. Ademais, os vales deberán corresponder ao mes de setembro de 2019 e poderanse recoller nas oficinas de Asetem-CCA ata o día 4 de outubro. Unha vez recollidos, as familias terán de prazo ata o 31 de outubro para investilos en calquera comercio asociado.
“Pensamos que é unha boa campaña e das máis útiles, tendo en conta que sempre se agradece calquera desconto e, sobre todo, se falamos do comezo do curso escolar e do mes de setembro”, apunta Pilar López, xerente de Asetem – CCA.
Gran festa infantil como fin de campaña
Paralelamente ao Bono Asetem tamén este ano, e por segunda vez consecutiva, a asociación de empresarios organiza a campaña “Volta ao cole”. A dinámica será a seguinte: todos os tíckets dos locais asociados por valor igual ou superior a 10 euros, dende o 1 ao 27 de setembro, darán acceso a unha gran festa infantil que se celebrará o venres 27 de setembro.
A festa terá lugar en horario de 17.00 a 20.00 horas no parque Rosalía de Castro (Melide) e, en caso de non acompañar as condicións meteorolóxicas trasladarase ao Palacio de Congresos e Exposicións. Os tíckets, que poderán ser de calquera artigo, trocaranse o propio día da festa por pulseiras identificativas que permitirán o acceso á mesma e a participación nas diferentes actividades e obradoiros previstos.