Ordes, 17 de xaneiro do 2017 – A Mancomunidade de Municipios da Comarca de Ordes manterá o seu Servizo de Normalización Lingüística. Foi un dos acordos aprobados no pleno que tivo lugar esta semana.
Para continuar co servizo a Mancomunidade solicitará a subvención provincial convocada pola Deputación da Coruña, cuxo importe máximo ascende a 12.000 €. A Mancomunidade continúa así coa política de uso e fomento da lingua galega nos distintos ámbitos da sociedade.
O Servizo de Normalización Lingüística leva funcionando na Mancomunidade de Ordes desde o ano 2013. Entre outras actividades e iniciativas realiza cursos de preparación para a obtención da certificación Celga e para persoas estranxeiras, asesoramento e apoio ao persoal de distintos concellos da comarca, organización de xornadas e xincanas lúdico-educativas dirixidas a público infantil, conmemoración de datas e celebracións destacadas como o Día de Rosalía e o das Letras Galegas con iniciativas en centros escolares, ademais doutras actividades de intervención sociolingüística e do asesoramento lingüístico a calquera persoa usuaria da comarca (información sobre os Celga, validación de estudos, ligazóns lingüísticas de interese etc).
