Bisbarra, 6 de novembro do 2023 – A veciñanza da parroquia de Fruíme leva sen servizo de telefonía desde o 24 de outubro o que levou ao concello de Lousame a denunciar a Movistar.
O concello explica que en estes once días Movistar non foi quen de identificar a incidencia e se limita a contestar que se está traballando nunha pronta solución. Lousame leva dende o pasado 24 de outubro facendo chamadas de denuncia e presentando queixas por escrito
A alcaldesa, Teresa Villaverde, explica que “estamos falando dunha parroquia con moita xente maior, polo que dende o Concello estamos preocupados porque sabemos que moitos deles teñen servizo de teleasistencia e que para case todos o móbil converteuse no seu único medio de contacto coa familia. Pero tamén hai empresas que están a verse prexudicadas pola falta de empatía que Movistar amosa cara as familias e empresas do rural”.
O pasado 31 de outubro chegou unha resposta por escrito de Movistar na que reproducen as mesmas indicacións que por teléfono: que son conscientes da existencia dunha incidencia, que non identifican pero na que aseguran levan máis de 10 días traballando para a súa pronta resolución.
Villaverde engade que “se despois de dez días de traballo non foron quen nin de identificar o problema, a compañía ou ben ten unha falta total de empatía co rural ou amosa unha total incompetencia á hora de resolver os problemas técnicos”.
A alcaldesa de Lousame asegura que “imos seguir reclamando a Movistar que arranxe xa os problemas en Fruíme e estudaremos tamén a posibilidade de cambiar o contrato do servizo telefónico do Concello. Porque se unha compañía amosa esta falta de empatía coa veciñanza, tampouco queremos que nos presten servizo”.
