Compostela, 5 de xullo do 2017 – Xosé Neira Vilas deixou entre o seu legado póstumo un conxunto de relatos nos que cambia a súa amada terra galega polos mares do mundo. Unhas historias que o autor crucense falecido en 2015 recompilou de varios mariños mercantes galegos e que agora ven a luz no libro Os papeis do vello mariñeiro.
Neira Vilas ofrece, a través de entretidos contos, unha clarificadora visión dun mundo moi descoñecido: o dos mariñeiros que pasan longas tempadas en alta mar percorrendo lugares do máis diverso e coñecendo países, xentes e culturas ben diferentes á propia. Experiencias que conforman unha forma de ser moi particular e que o autor transcribe nestes “papeis” póstumos para que poidamos coñecer mellor o vello mariñeiro galego e as súas peripecias polo mundo adiante nun tempo non moi afastado pero ben diferente ao actual.
Para novelar estas historias o autor creou o “vello mariñeiro”, un personaxe “dunha aldea do interior de Galicia, fillo e neto de labregos, e labrego el mesmo nos seus primeiros dezaoito anos de vida” que, tras a súa morte, deixa nun pallal, esquecidos, moitos dos recordos da súa vida de navegante. O cronista consegue entrar nese recuncho no que atopa “varios cadernos e papeis soltos” que pon “máis ou menos en orde” para escribir a vida daquel veterano mariñeiro.
Así nace este libro póstumo no que o autor “levaba traballando algo máis dun ano”, confirma Luís Reimóndez, presidente da Fundación Xosé Neira Vilas, e que non puido ver publicado tras o seu repentino pasamento. Unha obra que xorde da imaxinación do escritor pero tamén “da vida real, posto son historias que lle contaron a Neira navegantes galegos e que despois el novelou co seu inconfundible estilo”. Un estilo directo, non exento de humor e rico en detalles que, ao final do libro, deixan a sensación de coñecermos ao vello mariñeiro como se fose un vello amigo.
Este é o sexto título do autor que leva ao prelo Edicións Bolanda, tras Xosé Neira Vilas: Memoria Gráfica (2013), Díaz Pardo. Crónica dunha fecunda amizade (2014), Semente Galega en América (2015), Contos vellos para rapaces novos e Quique na aldea (2016).
Presentación en Compostela
Os papeis do vello mariñeiro preséntase este xoves 6 de xullo, ás 20:00 h, no Hotel Monumento San Francisco de Santiago. O acto contará coa presenza do propio Luís Reimondez, do editor Antonio Couto, do profesor e secretario Real Academia Galega Henrique Monteagudo, do presidente do Consello da Cultura Galega, Ramón Villares e do secretario xeral de Política Lingüística Valentín García.
