Lalín, 21 de febreiro do 2019 – O tenente de alcalde e concelleiro de Urbanismo de Lalín, Nicolás González Casares, acompañou aos mozos e mozos que coa autorización do Concello están realizando grafitti nos muros da praza superior do aparcamento público Aldea Grande.
Como sinalou “ante gran cantidade de rapaces e rapazas que practican esta actividade en Lalín e a demanda recibida, decidimos poñer á súa disposición muros libres como os da praza Aldea Grande e posteriormente valoraremos outros espazos do casco urbano, para que poidan realizar os seus grafitti de forma legal”.
Os espazos para pintar e as diferentes realízanse de maneira pactada co Concello. A iniciativa busca por un lado embelecer os espazos urbanos de zonas como a Praza Aldea Grande onde se ubica un parque infantil, unha cancha multideporte e un módulo de parkour e, por outro, promover esta arte urbana facilitándolle á mocidade que a practica os espazos adecuados. Tamén é importante destacar que o desenvolvemento deste tipo de murais reduce considerablemente as accións vandálicas consistentes na realización de pintadas en espazos públicos e privados que ensucian os espazos e o mobiliario urbano.