Bisbarra, 10 de abril do 2024 – O TSXG paraliza cautelarmente o parque eólico Pico Seco en Lalín tras a demanda presentada pola Asociación para Defensa Ecolóxica de Galicia, ADEGA.
Ao tempo que o presidente en funcións da Xunta de Galicia, Alfonso Rueda, explicaba no Parlamento que o seu futuro goberno so autorizará os proxectos que protexan o medio ambiente o TSXG daba de novo a razón a adega e paralizaba un novo proxecto eólico.
A Dirección Xeral de Planificación Enerxética dera autorización a o proxecto Pico Seco en abril do 2023. Agora o TSXG anula esta autorización xa que que “a instalación de aeroxeradores no espazo físico natural produce un impacto negativo sobre o medio ambiente, que se estende tanto ao propio ambiente, como sobre a paisaxe e o territorio”.
O Tribunal considera que os danos poden ser irreversibles e pon en dúbida a veracidade da Declaración de Impacto Ambiental en relación á avaliación do impacto sinérxico de todos os parques eólicos e outras infraestruturas que conflúen na zona de implantación.
ADEGA explica que, en aplicación do periculum in mora, o TSXG apela ao principio de precaución do Dereito Comunitario que impón actuar con vixilancia, xa que en caso de permitir a execución do proxecto e logo estimarse o recurso, “habería que desfacer o dano á costa do erario público, ademais de prexudicar á promotora e ter danado sen remedio o medio ambiente”.
Afección a especies vulnerábeis e posible fragmentación irregular
O polígono eólico Pico Seco prevé a instalación de 7 aeroxeradores de 180 metros de altura a carón da área de Rede Natura de Zobra e Serra do Candán, poñendo en risco a conectividade ecolóxica entre os ecosistemas desta área e outros espazos próximos como Pena Veidosa e Serra do Cando, e facendo practicamente imposible a circulación das especies que quedarían enclaustradas entre parques eólicos sen poder entrar e sen poder saír.
ADEGA sinala prexuízos irreversíbeis para varias especies vulnerables, destacando a presenza da tartaraña cincenta (Circus pygargus), e tamén danos sobre as poboacións de lobo, pois afecta directamente a zonas de encame e puntos de encontro desta especie. Especialmente significativo é o dano que este parque eólico causará ao camiño vello dos arrieiros e ao conxunto etnográfico do “Foxo do Cabrito” que foi unha antiga parada de arrieiros. Tamén impacta sobre o castro de Zacarade.
Por outra banda, ADEGA argumenta a existencia de fraude de lei pola fragmentación artificial dun macroproxecto eólico conformado por Pico Seco e Valdepereira, ambos complexos promovidos pola mesma empresa a poucos metros un do outro e con infraestruturas compartidas.
