Bisbarra, 12 de xullo do 2023 – Aínda que a presentación oficial será a primeiros de agosto xa se coñecen algunhas das actividades da Malla Tradicional de Doade que desde o ano pasado é Festa de Interese Turístico de Galicia.
Esta ano a Malla tradicional chegará á XXIV edición e complementarase co noveno Serán da malla. Celebrarase ao carón dun dos museos etnográficos máis importantes de Galicia, a Casa do Patrón, impulsada polo xerente e creador, Manolo Blanco. Que segue recuperando pezas e ampliando a exposición.
Blanco lembraba nun escrito como comezou a Malla Tradicional “Ningún dos compoñentes daquel reducido grupo de veciños de Codeseda, a miña aldea, cando nos reunimos para acender un dos motores de mallar poderiamos imaxinar no mellor dos soños que esta humilde iniciativa, destinada a tan só a rememorar a vida dos nosos devanceiros, se convertería grazas a nosa constancia e ilusión, xunto coa colaboración desinteresada de tanta xente, na gran malla da Terra Galega”.
Este ano a Malla Tradicional terá lugar o 19 de agosto. Comezará cunha mostra de artesanía e pintura as once de mañá para ás doce iniciar a Malla Tradicional co carrexo de mollos e os distintos tipos de malla: á pedra, con males… Tamén entregarase o premio ao mellor vestido de época.
Tras o Xantar Popular a partir das dúas da tarde comezará o noveno serán da Malla con distintos grupos folclóricos. Unha xornada que rematará a partir das sete da tarde co concerto de Cantos da Terra de o Salnés.
