Bisbarra, 18 de outubro do 2022 – A Xunta de Galicia ven de adxudicar por seis coma dous millóns de euros a mellora do saneamento urbano de Lalín.
A reforma incluirá o reforzo da capacidade dos colectores e un novo tanque de tormentas. O prazo de execución é de 12 meses. A previsión é comezar os traballos no actual saneamento antes de rematar o ano para que estea reformado a finais do 2023.
O proxecto contempla a execución de catro treitos principais. Dous nas marxes do río Pontiñas, un que recollerá as augas residuais da zona sur e as conducirá ao tanque de tormentas e outro colector que recollerá as augas da rede de saneamento da parroquia de Donramiro.
O tanque de tormentas terá unha capacidade de 5.000 m³, o que permitirá a retención das augas pluviais, evitando verter ao medio, e disporá dun alivio e dunha condución de baleirado, que funcionará por gravidade e se conectará á rede actual, conducindo o caudal ata a depuradora de Lalín.
Para ese baleirado instalarase unha válvula que limitará o caudal máximo de entrada na depuradora. AS obras teran en conta o caudal futuro tras a ampliación da planta de tratamento, que será obxecto dun proxecto independente.
As obras inclúen un sistema de desodorización innovador que evitará molestias na contorna do tanque de tormentas. A intervención prevé a integración paisaxística mediante unha plantación de árbores autóctonas na contorna, que contribuirán a manter este espazo de uso a carón do río Pontiñas.
Tamén se aproveitará a superficie de formigón do tanque de tormentas para desenvolver o ‘Parque do cocido’, un espazo de ocio infantil con elementos de xogo inspirados neste emblema da vila, de acordo cunha iniciativa promovida polo Concello desde hai tempo.
Nesta contorna crearase unha zona de xogos con tiroliña; un túnel de rede con forma de chourizo; unha gaiola de rede tamén con forma de porco no que os nenos poderán practicar diferentes actividades no seu interior: xogos de pelota, labirinto, paredes trepadoras, redes, tobogán.
As obras contarán co cofinanciamento da Unión Europea, no marco do Programa Operativo FEDER Galicia 2014/2020.
