Compostela, 14 de xuño do 2021 – A Asociación de Hostalería Compostela prepara a convocatoria de novas eleccións para o mes de xullo.
Tres dos que foran presidentes da entidade, Sara Santos (Hotel Rúa Villar e Pensión Rúa Nova), José Antonio Riveiro (Café Casino e A Casa da Viña) e José Antonio Liñares (hoteis Costa Vella, Altaïr e Moure), pediron a implicación do sector para manter viva a Asociación.
Na conversa cos medios deixaron entrever que hai un proxecto formado pero que necesita unha cara visible. Consideran que a feito de que o concurso de acredores se paralizara indica que a xestión económica vai por bo camiño. A volta paulatina a normalidade fai necesario, según eles, retomar a actividade como colectivo.
Un proceso complexo
En marzo a última Xunta Directiva convocou unhas eleccións que foron suspendidas ao no presentarse ninguén. Nunha Asemblea Xeral Extraordinaria dimitiu toda a directiva que delegou, de xeito provisional, no xerente da entidade, Ramón García Seara.
Santos, Riveiro e Liñares explicaron que actualmente a entidade non está en concurso. “As débedas están sendo solventadas, lentamente, pero solventadas”, sinalaron. Afirmaron tamén que un sector como o seu, composto maioritariamente de pequenos autónomos e microempresas, necesita dun movemento asociativo forte que defenda os intereses específicos da hostalería, que fomente a formación e a innovación e que manteña unhas cordiais relacións coas distintas administracións. “Esta asociación creada hai máis de corenta anos é pioneira do asociacionismo e hoxe en día representa a 600 locais de Santiago e a súa comarca”, destacaron.
Nestes máis de corenta anos de historia milleiros de alumnos formáronse ou recicláronse nos cursos impartidos nas aulas de formación, centos de negocios abriron as súas portas asesorados polo persoal da asociación, innumerables trámites burocráticos foron facilitados aos asociados: licenzas, permisos, sancións, consultas e un longo etc. A Asociación propiciou unha case sempre fluída e produtiva interacción coas administracións e os medios, impulsando melloras para o sector a través de acordos e convenios. Tamén organizáronse de maneira exitosa multitude de actividades de dinamización do sector e de toda a cidade como o concurso Santiago(é)Tapas, a Festa das Uñas de San Lázaro ou as xornadas gastronómicas de cabra do Banquete de Conxo.
“Todo este traballo non debe caer no esquecemento”, sinalaron os expresidentes, animando a que outros hostaleiros tomen o temón que eles deixaron no seu día, fagan os cambios necesarios e “leven a nave a bo porto”. “Estamos non momento de poñernos a traballar, máis aló de enfrontamentos políticos, e superar xuntos dunha vez por todas esta pandemia”, concluíron.
Ao acto tamén asistiron os socios Javier Míguez (Grupo Las Bodeguillas) e Avelino Martínez (Restaurante O Dezaseis).
