Compostela, 31 de maio do 2018 – A Fundación Andrea organiza o próximo domingo, na igrexa de San Martín Pinario un concerto solidario coa participación do Phoenix Boys Choir.
Será a única actuación do Phoenix Boys Choir en Galicia. A formación, chegada desde Arizona, ofrecerá un repertorio de música Sacra interpretada polos 32 nenos que compoñen a agrupación. O coro está dirixido polo prestixioso Georg Stangelberger e estarán acompañados ao piano pola recoñecida instrumentista Xuelai Wu. O concerto terá lugar as oito e media da tarde e o prezo da entrada é de 10 euros.
Este concerto ofrécese integramente a beneficio da Fundación Andrea e forma parte da xira que este reputado coro estadounidense, con múltiples premios e recoñecementos no seu haber, realizará por España e Portugal entre o 1 e o 17 de xuño de 2018.
A Fundación Andrea agradece a Perform in Spain, así como ao Reitor do Seminario Maior, D. Carlos Álvarez, a súa xenerosa colaboración e a súa magnífica disposición para facer posible a celebración deste concerto a favor da organización en Santiago.
As entradas poderanse adquirir o mesmo día da representación a partir das 19:30 hs., na porta da Igrexa de San Martín Pinario ou reservándoas con antelación na propia Fundación Andrea no teléfono: 648-944 422.
