Bisbarra, 10 de marzo do 2022 – Os despedimentos en Ambulancias do Atlántico veñen de provocar a convocatoria dunha folga iondefinida no sector a partir do 28 de marzo.
CIG Compostela convoca a folga na UTE Casamblanca y otros que engloba a Ambulancias do Atlántico, Ambulancias Casablanca, Ambulancias do Nordés, Ambulancias Ortigueira e Ambulancias Quiroga. Esta unión temporal é a concesionaria do servizo de transporte sanitario urxente na área sanitaria de Santiago.
Despedimento en Ambulancias do Atlántico
O detonante de esta convocatoria é o despedimento dun traballador na base de Ambulancias do Atlántico de Santiago. Desde o sindicato CIG explícase que “tras 3 semanas de mobilizacións e reunións coas diferentes empresas e diante da falla de solucións a esta situación as asembleas de traballadoras e traballadores acordaron a convocatoria dunha folga indefinida en toda a UTE”.
Os traballadores reclaman a readmisión do despedido e o cumprimento de todos os acordos que desde o inicio do concurso existen nesta área sanitaria.
Consideran o despedimento “totalmente inxustificado, foi comunicado o pasado 15 de febreiro ao traballador sumándose a outros catro que na semana anterior se produciran en Vigo”.
Xa se realizaron diversas accións de protesta, tanto en Mos como en Santiago, onde mesmo se desenvolveu unha manifestación que fixo un percorrido desde o SERGAS, pasando pola base de Ambulancias do Atlántico até a sede da UTE, responsabilizando a administración e as empresas dunha situación que desde a central sindical se considera inaceptable.
Desde a CIG anuncian un conflito longo e duro de non acadarse unha solución que unicamente pasa pola readmisión. En Vigo, o comité de empresa ten previsto celebrar unha asemblea o sábado para decidir se tamén se convoca folga, neste caso só en Ambulancias do Atlántico, porque alí ten a concesión en solitario, que podería confluír coa convocatoria de Santiago.
