Bisbarra, 20 de febreiro do 2024 – Este venres comezan os tres días principais da 49º edición da Festa do Queixo de Arzúa.
Concertos, obradoiros, un pregón a cargo da actriz María Vázquez e por suposto unha feira na que atopar todos os queixos que un poida imaxinar. A Festa do Queixo de Arzúa ofrecerá ademais os concertos de música pop o sábado e máis folquis o domingo.
A presentación oficial tivo lugar hai unha semana e nela o alcalde de Arzúa, Xoán Xesús Carril, destacou a importancia da Festa do Queixo non só para a vila se non para toda Galicia. Carril destacou que “o evento non e só unha exposición de produtos lácteos, senón unha experiencia para compartir coñecementos e unha ocasión para degustar e desfrutar de produtos gastronómicos propios e alleos”.
O presidente do Consello Regulador da Denominación de Orixe Protexida Arzúa Ulloa, José Luís Lamas, puxo en valor a colaboración dos produtores que aportan 200 quilos de queixo para os obradoiros e agasallos e destacou a colaboración no concurso de pinchos no que participan 16 establecementos.
Lamas engadiu que o ano pasado bateuse un récord xa que se venderon máis de catro millóns de euros en queixos. Destacou ademais que desde que a certificación comezou no 1997 a denominación leva colocados no mercado máis de setenta e cinco millóns de quilos de queixo. Estes datos a converten a primeira DOP en produción e venda en Galicia e a primeira en queixos elaborados de vaca en España.
Programación
O director do Festival do Queixo, Alberto Alonso, encargouse de presentar a programación máis musical da Festa. A Festa do Queixo de Arzúa contará con 7 actuacións entre sábado e domingo, 5 galegos e dous estatais. O sábado Tu Futura Exmujer, gañadores do ‘Queixo Maquetón’ (21:30 h), La Plazuela (22:25 h), Arde Bogotá (00:20 h) e Grande Amore (02:05 h).
O domingo De Vacas (12:30 h) Guadi Galego (18 h) e Fillas de Cassandra (19:50 h).
Alonso fixo fincapé no sistema de acceso, que como o ano pasado será de balde ate completar o aforo de 3.300 persoas, e rematou agradecendo ao Concello contar novamente co seu traballo e animou a todos a asistir e desfrutar.
O ex alcalde e concelleiro de cultura de Arzúa, José Luís García, agradeceu o apoio dos traballadores que supliron as súas ausencias, xa que por motivos de saúde non estivo ao 100% na preparación desta edición. En canto ao deseño do cartel, explicou que este ano foi unha encarga debido fundamentalmente ás queixas dos profesionais, así como á vontade de dar oportunidades a deseñadores e ilustradores locais.
O Concelleiro agradeceu a axuda de EFA Piñeiral e a das empresas privadas involucradas nos cursos e promocións do queixo. “Na maioría das casas de Arzúa hai algún avó ou avoa que traballou no queixo” e destacou a importancia dar a coñecer esta tradición histórica e cultural aos cativos. Nese senso agradeceu tamén a EFA Piñeiral polas actividades que fai, a través das seccións de repostería ou marketing.
