Bisbarra, 27 de maio do 2022 – O Día Mundial do Medio Ambiente, 5 de xuño, a Coordinadora Eólicos Así Non convoca unha marcha baixo o lema “Temos Alternativa!”.
A manifestación partirá as doce da Alameda e rematará na Parza do Obradoiro. Eólicos Así Non está formada por 180 entidades e plataformas ecoloxistas, veciñais, sociais, culturais e sindicais de toda Galiza
Un modelo enerxético xusto
Eólicos Así Non dou unha rolda de prensa para presentar a convocatoria na que fixo un chamado “a toda a sociedade galega para que participe na gran mobilización social”. Explican que buscan defender un modelo enerxético xusto e sustentábel e unha enerxía por e para o pobo.
Con motivo do Día Mundial do Medio Ambiente, as entidades convocantes queren chamar a atención sobre a necesidade de rachar co modelo tradicional de produción e consumo de enerxía. O obxectivo é “acadar unha transición ecolóxica e unha descarbonización da economía socialmente xusta e ecoloxicamente viábel”.
Desde a Coordinadora Eólica Así Non advírtese de que “o actual modelo de transición no eido enerxético só responde aos intereses das grandes corporacións da enerxía e que non contribúe a superar o reto climático, pois segue apostando polo espolio do territorio, a fragmentación de hábitats, a perda de biodiversidade e por unha produción intensiva e centralizada da enerxía que somete cautiva á sociedade”.
Eólica un ano despois
Hai un ano a coordinadora Eólica Así Non congregou a milleiros de persoas na Praza do Obradoiro para reclamar a moratoria dos proxectos eólicos en tramitación e unha nova planificación eólica.
Hoxe en día seguen defendendo esta medida e engaden a necesidade dun cambio de modelo enerxético “que se enfronte á lóxica do crecemento capitalista, que rache a dependencia entre o aumento do consumo da enerxía e a mellora do noso benestar social”.
Na convocatoria do cinco de xuño lerase o manifesto titulado como o lema da marcha “Temos Alternativa!”. O documento enumera 9 principios nos que se debería fundamentar o novo modelo enerxético para ser xusto e sustentábel, e para dar servizo por e para o pobo.
A protección da natureza e da biodiversidade como base da transición ecolóxica; cumprimento das normativas europeas de protección ambiental; coidado do patrimonio cultural; preservar o dereito dos galegos a súa soberanía e seguridade alimentaria; primar o aforro e a eficiencia fronte ao aumento da capacidade; que Galicia poida decidir sobre o uso dos seus recursos; deseño dunha nova planificación enerxética; derogación das leis de “depredación” e finalmente precaución para preservar a saúde pública.
Manifesto
Tedes o texto completo no seguinte enlace manifesto
