Bisbarra, 18 de xaneiro do 2024 – Cando algunhas vilas aínda están desmontando o alumeado de Nadal, o Entroido chama as portas da bisbarra e os concellos comezan a anunciar desfiles e eventos.
O Entroido do Ulla, o dos Xenerais, comparsas e correos, comeza xa esta mesma fin de semana polo que este ano non hai respiro. Hoxe mesmo preséntase a Festa da Filloa de Lestedo que tradicionalmente pecha estas festas e que se celebrará o 18 de febreiro.
Todo o relativo aos Xenerais da Ulla o tedes na súa páxina web e nun calendario moi completo que podedes atopar aquí e no que tedes mesmo as coordenadas GPS para que non vos perdades. Pero tamén están os desfiles e bailes de disfraces de outros concellos que non convén perderse.
Brión marca a data do 11 de febreiro para o seu desfile. Partirá as catro e media do Pavillón Municipal para percorrer o paseo dos Pedrouzos e a rúa Tarrío para chegar ao Parque de Lamiño. Estará acompañado pola Charanga Os Celtas. O baile de Entroido contará coa música do grupo Lume e as inscricións ábrense o día 22 e durarán ata o 8 de febreiro.
Val do Dubra tamén presentou xa os seus concursos de disfraces. O de adultos un día antes que o de Brión, o día 10 de febreiro; e o infantil uns días despois, o 13 de febreiro. En este caso as inscricións serán do 29 de xaneiro ao 2 de febreiro. A cita do desfile de adultos será as catro e media no Campo da Feira para saír ás cinco ata a casa do concello.
O día 10 haberá que elixir ou, si se quere ver todo, repartir o tempo porque en Negreira tamén celebran o desfile de comparsas e carrozas. A partir das catro concentración no Campo da Feira para saír as cinco percorrendo o centro da vila. A entrega de premios a partir das 8 diante do concello e todo coa compañía da Charanga Tíralle do Aire. A música na festa final será do grupo Unión y Fuerza. Negreira celebra ademais unha festa de disfraces infantil o luns día doce, a partir das cinco e media da tarde no pavillón do CEIP O Coto.
Iremos contando o Entroido no resto dos concellos pero lembrade que aquí non se para. A finais de febreiro, despois de repoñernos un pouco do Entroido, chega o Santiago (e) Tapas e a continuación case sen parar a Festa do Queixo de Arzúa, ide anotando que con tanta troula e fácil perderse algo.
