Bisbarra, 22 de xullo do 2022 – O Colexio Eusebio Lorenzo Baleirón de Dodro recibirá unha reforma integral que suporá un investimento de máis de un millón catrocentos mil euros.
A nova foi comunicada, nun encontro coa directora do centro, polo Delegado Provincial da Xunta de Galicia, Gonzalo Trenor. O proxecto para o Lorenzo Baleirón forma parte do Plan de Nova Arquitectura Pedagóxica da Xunta
Trenor avanzou que a intervención recolle a renovación de todo o envolvente da edificación: fachadas, cubertas e carpinterías; a substitución de todas as instalación de luminarias e a mellora da accesibilidade coa construción de novas rampas e renovación de pasamáns.
A obra incluirá a execución dunha pérgola na zona de acceso e a substitución da pérgola existente entre o edificio de primaria e secundaria. Realizaranse ademais actuacións no interior do inmoble, coa reforma dos aseos de primaria e o espazo destinado a biblioteca.
A intervención completarase co pintado completo do centro e coa mellora do revestimento no patio cuberto central. Tamén está prevista a substitución dos falsos teitos no interior, nos patios exteriores e no porche do edificio de primaria. O Plan de Nova Arquitectura Pedagóxica da Xunta de Galicia, ao que pertence a actuación no Eusebio Baleirón, ten como obxectivo principal impulsar novos espazos escolares “máis innovadores, sostibles e confortables, acordes cos novos retos de futuro da educación”.