Bisbarra, 7 de setembro do 2018 – Os concellos Dodro, Padrón e Rois promoven un obradoiro de emprego sobre o sector turístico dirixido a persoas menores de 30 anos en situación de desemprego.
Para participar no obradoiro os candidatos teñen que ter o título de Bacharelato ou un ciclo superior de FP e, ademais, estar inscritos no Programa de Garantía Xuvenil. Os interesados poderán solicitar máis información nos tres concellos participantes o antes posible, pois está previsto que o obradoiro comece a finais de setembro.
Financiado pola Iniciativa de Emprego Xuvenil e o Fondo Social Europeo, este obradoiro desenvolverase durante 6 meses, incluíndo a parte teórica e práctica. Baixo a denominación Obradoiro de Emprego Xuventude en Acción 2018, o alumnado seleccionado poderán formarse na especialidade de Promoción turística local e información ao visitante. Ademais, durante o medio ano de duración, os seleccionados terán un contrato de formación e aprendizaxe que lle permitirá cobrar un salario.
Ao rematar o Obradoiro de Emprego Xuventude en Acción 2018 o alumnado recibirá o certificado de profesionalidade correspondente. No caso de que non se cubran as prazas con candidatos destes tres municipios, ampliarase a selección a concellos limítrofes, dando prioridade a aqueles que non teñan proxectos similares.
A formación que se impartirá versará sobre a actividade de creación de paquetes turísticos culturais e naturais; creación de produtos turísticos aproveitando recursos culturais e naturais da comarca, traballo diario de potenciación do turismo nas redes sociais, actualización da páxina web Terras de Iria e atención da oficina de turismo de Padrón e dinamización. As bases íntegras desta convocatoria pódense consultar na páxina web do Concello de Rois.
