Bisbarra, 13 de febreiro do 2024 – O Boletín Oficial ds Provincia publicou este luns a resolución de axudas do Plan de Emprego Local de Concellos da Deputación da Coruña.
Este plan de emprego ten un orzamento de tres millóns e medio de euros en total e permite aos concellos contratar a persoas desempregadas para a prestación de servizos básicos municipais. No 2024 son un total de 92 concellos que contratarán a máis de 400 persoas durante un período máximo de un ano.
O presidente da Deputación, Valentín González Formoso, destacou o “carácter social” desta liña do PEL, que “prima a contratación de persoas con especiais dificultades de inserción laboral”. O Plan supón tamén “unha aposta polo mundo rural”, xa que o 84% dos fondos (2.964.193 €) concédense a municipios de menos de 20.000 habitantes.
Prioridade ás persoas con máis dificultades
Á hora de seleccionar o persoal, os concellos deberán aplicar criterios sociais e dar prioridade á inserción de persoas que pertenzan a colectivos con maiores dificultades para atopar emprego.
Beneficiarase a persoas maiores de 45 anos, desempregadas de longa duración, persoas cun grao de discapacidade igual ou superior ao 33%, pertencentes a fogares con todos os seus membros en paro, vítimas de violencia de xénero, en risco de exclusión laboral ou mulleres.
Dentro destes colectivos, os concellos primarán a aquelas persoas que teñan rematado favorablemente programas de capacitación, formación e integración no mundo laboral organizados ou financiados polas administracións públicas.
Entre 19.000 e 75.000 euros por concello
Os importes que reciben os concellos de menos de 50.000 habitantes varían en función da porcentaxe resultante de dividir o número de persoas desempregadas en cada concello entre o número total de persoas desempregadas nos concellos de menos de 50.000 habitantes, oscilando as contías entre os 19.000 e os 52.000 euros. Pola súa banda, os concellos da Coruña, Ferrol e Santiago de Compostela optan a unha contía única de 75.000 euros.
Os operarios e operarias, deberán ser contratados cunha xornada mínima semanal de 25 horas. As axudas destinaranse a sufragar os custos salariais, de Seguridade Social, as indemnizacións por fin de contrato e a formación en materia de prevención de riscos laborais das novas contratacións.
Bisbarra
Na bisbarra os concellos máis beneficiados, ademais do de Compostela, son os de Ames e Teo con 52.000 euros; Ordes e Padrón con 49.000; Negreira, Santa Comba e Brión con 46.000 e Oroso e Melide con 43.000 euros de axuda. O resto dos concellos reciben cantidades que van desde os 19.000 de Toques aos 37.000 de Rois.
