Touro, 29 de decembro do 2020 – A Marea Veciñal de Touro denuncia irregularidades na selección dos participantes no obradoiro de emprego de Touro.
O grupo político pide á Dirección Xeral de Orientación e Promoción Laboral que investigue o obradoiro de emprego e restitúa o dereito dos prexudicados/as na selección do alumnado-traballador.
Erros nos baremos de puntuación
O obradoiro de emprego de Touro é compartido polo concello cos de Boqueixón, O Pino e Vedra. Desde a Marea Veciñal de Touro explícase que foron incumpridas as bases na preselección de candidatos, algo que podería anular o proceso.
As irregularidades denunciadas céntranse na valoración dos méritos. Según a Marea varios alumnos quedaron fora do proceso xa que a Comisión de Selección non lles puntuou a súa situación de “protección por desemprego”, que tiña un valor de catro puntos.
O partido Veciñal de Touro sospeita da “intención clara de prexudicar e non seleccionar aos candidatos que non se lles puntuou ese apartado” porque “É bastante estraño que se produzan erros na aplicación dun baremo tan sumamente sinxelo, e que precisamente a consecuencia sexa a non selección dalgúns dos afectados”.
Entrevista persoal
O partido tamén considera que a entrevista persoal “e carente de total transparencia, subxectiva e sen garantía algunha para os candidatos, é simplemente unha ferramenta de enchufismo xa que non existe rexistro (gravación) da mesma, o que fai que os candidatos non poidan reclamar nada”.
Revisión de oficio
A Marea Veciñal propuxo á Comisión de Valoración e á Dirección Xeral de Orientación e Promoción Laboral que ante esta situación se faga “revisión de oficio” da valoración de todos os candidatos. Se como resultado desa revisión variase a puntuación dos candidatos/as, deberanse artellar solucións excepcionais que restitúan o dereito dos prexudicados sen prexudicar a quen ten dereitos consolidados (a quen foi seleccionado/a). Así, o partido Veciñal propón que, de xeito excepcional, se amplíen as prazas até dar cabida a aqueles/as que unha vez revisada a puntuación esta sexa superior á que actualmente ocupa o último posto na selección.
