Compostela, 2 de outubro do 2018 – Hoxe o Festival Internacional de Cine Curtocircuito abre a retrospectiva do director Bertrand Mandico que estará na cidade.
O Teatro Principal acollerá a partir das oito e cuarto a proxección da película Les garçons sauvages, a primeira longametraxe do director. Ademais do propio Bertrand Mandico na sala estará a actriz Elina Löwensohn, unha das protagonistas. Mandico ten traballado con institucións de arte de toda Europa. Algúns das súas curtas competiron en festivais como Cannes ou Venecia acadando distintos premios mentres sacou adiante o proxecto de dirixir 21 películas en 21 anos.
Les garçons sauvages
Outras citas da xornada
Curtocircuito acollerá ás 10h00 no edificio Obra Social Abanca, a segunda e última, sesión do Seminario Arredor do Son: cara una práctica do deseño sonoro impartido por Charly Schmukler. Ademais continúan as proxeccións dedicadas aos máis novos dentro da sección Criaturas, que reunirá a un total de 250 alumnos e alumnas dos centros CEIP Pio XII, o CEIP Roxos e o colexio Vilas Alborada de Santiago de Compostela.
A programación de Arredor so son II continuará ás 16h30 coa conferencia O mal é sempre humano. O corpo da balea na cultura audiovisual moderna impartida por José Luis Espejo e Jessica Sarah Rinland, protagonista nesta 15º edición da sección Púlsar. O mal é sempre humano é un proxecto en proceso do investigador José Luís Espejo que relata o papel que tivo o corpo da balea no desenvolvemento do capitalismo actual a través da análise das imaxes e sons que os seres humanos crearon ou captaron destes mamíferos mariños. A balea é tamén un suxeito frecuente na filmografía de Jessica Sarah Rinland, na que aparece como un punto de partida que lle permite tratar cuestións vinculadas coa ecoloxía, a historia, a representación dos animais no cine, o medio ambiente ou os cambios culturais.
Pola tarde o Teatro Principal acollerá a segunda sesión da sección Explora onde contarase coa presenza do cineasta Michael Fleming para presentar o seu filme The Garden of Deligth.
A protagonista do remate da xornada será a segunda sesión de Planeta GZ, sesión adicada ao cinema galego, na que estarán os directores Ángel Santos, Judith Adataberna, Adrian Canoura e Oliver Laxe.
