Compostela, 03 de xaneiro do 2023 – Unha recente enquisa do INE mostraba que por primeira vez o castelán é o idioma máis falado por diante do galego.
As enquisas feitas polo Instituto Galego de Estatística dan resultados algo distintos pero pódese dicir que o castelán e galego están nunha situación de empate técnico e que crece o uso bilingüe.
Lindeiros falou hai uns días con Valentín García Gómez, Secretario Xeral de Política Lingüística, para saber un pouco máis sobre o momento que vive o idioma galego. Comezamos preguntando por esa enquisa e sobre a visión que se ten desde a Secretaría.
Non hai moito comezouse a falar dos neofalantes como unha oportunidade para que creza o número de usuarios do galego. Valentín García pensa que o é e que temos que ser flexibles co uso que fan da lingua xa que ao principio todos cometemos erros.
Fronte a unha percepción dramática do uso do galego que as veces fan, facemos, os medios de comunicación hai cada vez máis plataformas que usan o idioma. Internet ten cada vez máis canles nos que o galego cobra protagonismo e redes como Tik Tok, Instagram Twetter ou Facebook teñen comunidades moi activas no usa do galego
Na liña das novas tecnoloxías destaca o proxecto Nós impulsado desde a Universidade de Santiago de Compostela co apoio da Xunta de Galicia. Síntese de voz e recoñecemento da fala,
sistemas de diálogo, tradución automática ou corrección e avaliación lingüística automática son algúns dos campos nos que traballa este proxecto
O vindeiro Día das Letras Galegas estará dedicado a Francisco Fernández del Riego coincidindo cos 60 anos de estas xornadas e os 110 do seu nacemento. Un home que formou parte da xeración que continuou o traballo da Nós e que converteuse nunha referencia do galeguismo.
Rematamos a conversa preguntando polo momento que vive o eido da cultura en manifestacións como a música ou a literatura. Cada semana saen á rúa novas producións cunha gran calidade e que están ampliando o público máis alá das fronteiras do noso territorio
Valentín García Gómez é unha das persoas que mellor coñece a situación do galego e o demostra en calquera conversa. Ao mesmo tempo mantén unha boa relación con tódolos sectores culturais, algo non moi doado nos tempos que corren.
A súa formación máis académica, que case nunca se menciona, abala ese coñecemento xa que é licenciado en Filoloxía Galego-Portuguesa, posgrao e mestrado en Administración Local (USC) e diplomado en música polo Conservatorio de Santiago de Compostela.
Pero máis alá do que saiba está o que sinte. Uns poucos minutos de conversa con Valentín bastan para decatarse do amor que ten polo galego e pola súa terra. Iso é moito máis do que se alcanza a ver en outros moitos responsables e é de agradecer.
