Compostela, 16 de marzo do 2019 – O proceso de diálogo competitivo que permitirá a ampliación da depuradora da Silvouta comezaba onte coa sinatura do contrato entre o concello de Santiago e Acuaes.
Martiño Noriega, alcalde da cidade, e Rosa Cobo, directora xeral do ente público, eran os responsable de rubricar o documento. O contrato é o primeiro paso para que Acuaes poida escoller á empresa que se encargue da redacción do proxecto da EDAR. O diálogo competitivo é unha figura contemplada na Lei de Contratos, pola que o órgano licitador require solucións innovadoras para un problema cuns condicionantes concretos. No caso da depuradora, primaranse solucións que garantan a construción da infraestrutura nos terreos da depuradora Silvouta, cuns prazos que permitan acceder aos fondos europeos consignados para a actuación, e cunha solución tecnolóxica innovadora.
O convenio asinado sinala que será o Concello o que asuma o custo do diálogo competitivo, fixado nun máximo de 450.000 euros. Tal e como explicou o alcalde, “a cifra que achegue o Concello para este proceso será compensada despois no convenio para a construción da EDAR, de xeito que os custos finais para as arcas municipais serán os mesmos”.
