Compostela, 27 de xullo do 2023 – Na tarde de este mércores o concello de Santiago daba a coñecer a paralización das obras de acceso ao que sería a futura gasolineira de Brandía, en Vidán.
A construción da gasolineira, coa oposición dos veciños, está inmersa nunha maraña xudicial de incerto resultado. A paralización das obras é un chanzo máis en este polémico proxecto. En este caso o concello paraliza a obra dos accesos á gasolineira e os “usos que de esta se derivan”.
O concello ordena a paralización por “non axustarse ás condicións sinaladas no título municipal habilitante pendente da primeira ocupación”. A suspensión ten carácter executivo e inmediato e data do 20 de xullo. O concello explica ademais que as obras non teñen “autorización para acceso permanente ao estar pendentes de que a comunicación previa de primeira ocupación despregue os seus efectos, condición necesaria para a autorización”.
Un proxecto no xulgado
A historia xudicial de este proxecto ten varios capítulos. Tras obter a licencia de apertura e construción, o Colexio de Enxeñeiros denunciou nos tribunais á empresa porque o proxecto estaba asinado por un arquitecto e tiña que ser, segundo eles, un enxeñeiro.
O tribunal doulle a razón e ordenou a demolición de todo o construído. Esta sentenza foi recorrida. No proceso o concello de Santiago viuse obrigado tamén a recorrer, o contrario sería recoñecer que a licencia fora mal outorgada.
No mes de xaneiro o concello aprobaba unha modificación do PXOM que impide a construción da gasolineira no mesmo sitio no que está na actualidade. A empresa foi de novo ao xulgado xa que considera que a licencia outorgada é correcta e que, en calquera caso, a orde de demolición pendente de recurso non ten que ver coa ubicación xa que se trata dun conflito de competencias entre colexios profesionais.
De tal xeito que por un lado os xulgados terán que resolver o problema de competencias entre enxeñeiros e arquitectos e manter, ou anular, a orde de demolición. Por outro teñen que resolver si a modificación do PXOM é, ou non, correcta o que implica que, no caso de ter que se demolida, pode pedir de novo a licenza ou non.
Agora, a maiores, a obra non continuará xa que o concello advertiu a empresa que “con esta paralización se poderán adoptar as medidas provisionais necesarias para garantir a total interrupción da actividade, tales como precintado das obras, a retirada de materiais e maquinaria, a suspensión de subministracións ou a execución forzosa mediante a imposición de multas coercitivas, que se reiterarán ata acadar o cumprimento da orde de paralización e calquera outra medida que sexa conveniente a prol da efectividade da suspensión”.
Unha orde de paralización que, polo visto anteriormente, acabará nos tribunais.
