Compostela, 11 de abril do 2024 – Os orzamentos participativos foron unha das iniciativas do goberno de Compostela Aberta que quedaron aparcadas na pasada lexislatura.
O novo goberno de coalición, BNG Compostela Aberta, recuperounos e ven de mostrar os resultados da iniciativa que non poder ser máis positivos. Máis de mil xoves da cidade participaron no proceso de elección das 10 propostas que se realizarán este ano.
A primeira tenente de alcalde María Rozas recoñecía na rolda de prensa que a experiencia serviu para que en este caso os resultados foran mellores xa que pasaron dun máximo de 300 votos nas edicións anteriores a os máis de 1000 de esta. A colaboración dos institutos e as charlas foron determinantes de este éxito.
Rozas pon sempre como exemplo a cidade brasileira de Porto Alegre, unha referencia en este tipo de procesos. Na segunda edición estiveron a punto de cancelar a iniciativa por falta de participación e hoxe en día son centos de miles os veciños que participan.
Variedade de propostas
Propostas relacionadas co cine, a música, os animais e a saúde foron as máis votadas nos Orzamentos Participativos do departamento de Xuventude. A partida destinada era de 100.000 euros pero as propostas non poderían supoñer máis de 15.000 para evitar que unha soa levara todo o diñeiro.
A proposta que recibiu máis apoios no proceso de Orzamentos Participativos, con 595 votos, foi a da realización dun ciclo de cine ao aire libre, no que sexa o público quen seleccione as películas proxectadas. Esta será a primeira actividade en executarse, previsiblemente a finais de xuño.
En segundo e terceiro lugar situáronse dúas actividades relacionadas coa música: un concerto dun grupo ou artista referente da escena musical actual; e un festival de música urbana, con artistas emerxentes de hip hop, rap, reggaeton, trap ou freestyle.
A cuarta proposta seleccionada polos participantes no proceso Compostela Decide é unha feira de adopción de animais, e en quinto e sexto lugar situáronse outras dúas propostas musicais: a celebración de festivais de música de diferentes xéneros como rock, indie, techno ou rock alternativo; e un festival de música con artistas emerxentes locais e galegos.
Un programa de voluntariado para o coidado e atención de animais situouse como a sétima proposta mellor valorada; mentres que a oitava foron actividades de música e cultura tradicional galega e foliadas abertas.
A lista das dez propostas que se executarán ao longo do ano con cargo aos Orzamentos Participativos complétase con dous proxectos do ámbito da saúde: a celebración de cursos de primeiros auxilios dirixidos á mocidade, e un programa de charlas divulgativas relacionadas coa saúde mental da xuventude.
María Rozas explicou que máis alá das actividades que quedan comprometidas no marco dos Orzamentos Participativos, “o departamento de Mocidade terá moi en conta á hora de deseñar a súa programación outras propostas moi interesantes que foron presentadas neste proceso pero que non resultaron ser as máis votadas, e que poderían ser executadas igualmente pola Concellaría”.
Nese sentido, a concelleira lembrou que no proceso foron validadas 103 propostas distribuídas en 15 categorías: Festivais de música e algo máis; Arte urbano e expresións artísticas; Culturas; Cine; Ciencia, Coñecemento, saberes; emprendemento; Ecoloxía e sostibilidade; Economía circular; Gastronomía saudable; eMocidade; Práctica deportiva; Igualdade, diversidade e educación sexual; Inclusión; Saúde; e Dereitos dos animais. En total, foron presentadas 286 propostas, pero moitas deles foron agrupadas porque eran coincidentes e outras non cumprían os requisitos técnicos en canto á súa viabilidade, límite orzamentario ou competencia municipal para o seu desenvolvemento.
