Compostela, 27 de agosto do 2019 – A Xunta de Goberno Local de Santiago adxudicou onte a oficina técnica do proxecto Smartiago dotado con seis millóns de euros.
O alcalde, Xosé Sánchez Bugallo, dicía na rolda de prensa posterior que Smartiago levaba dous anos de retraso e só se executaran 40.000 euros en este tempo. En todo caso o rexedor comprometeuse a dar a “maior celeridade posible para executar “en dous anos e catro meses o 99,3% do proxecto”. Referiuse tamén á posibilidade de solicitar unha prórroga. “En principio nos din que no é posible, pero imos intentar unha prórroga, cando menos, dun ano”, aclarou. Bugallo avanzou que en outubro sairán a licitación a renovación dos elementos de control de accesibilidade á cidade histórica; isto permitirá ademais de substituír elementos incorporar outros novos como o de Carretas.
Compostela Aberta non tardou en respostar as declaracións do alcalde. Aclaraban en primeiro termo que “o convenio entre o Concello e o Ministerio de Economía para o proxecto Smartiago asinouse en decembro de 2017” facendo referencia a imposibilidade de acumular un retraso de dous anos xa que aínda non pasaron. O único retraso ten que ver, según CA, co recurso que paralizou a oficina técnica do proxecto.
Tamén quixeron lembrar que a licitación dos elementos de acceso que, según o alcalde, licitarase en outubro saíu xa a licitación o 4 de xuño pasado.
Doazón de cadro
O Goberno local tamén deu o visto bo á doazón dun lenzo sobre óleo do retrato de Francisco Javier Vázquez Enríquez, quen fora alcalde de Santiago de Compostela entre novembro de 1934 e febreiro de 1936. O Concello xa conta tamén co retrato de Ánxel Casal, polo que “nos faltaría o de Raimundo López Pol, elixido alcalde nas eleccións de abril de 1931, para completar a lista dos alcaldes da Segunda República”, apuntou Sánchez Bugallo, quen indicou que nos próximos días se porá en contacto coa familia do ex alcalde para buscar a fórmula para ter ese retrato.
O retrato de Francisco Javier Vázquez Enríquez foi pintado por Elvira Santiso. Acéptase a doazón do devandito cadro a cargo de María Concepción Vázquez de Benito, neta do ex alcalde. O acto formal de cesión realizarase mañá martes.
Liquidación de contrato
Noutra orde de cousas, acordouse a liquidación do contrato para a execución das obras de rexeneración do pavimento de calzada do eixo das rúas Ponte Marzán-Sandino-Cruceiro de Sar. Dáse traslado do informe de liquidación á empresa contratista, Asfalgal Técnicas Viarias, SL, á que se lle concede un prazo de 15 días hábiles para formular alegacións.
Outros asuntos
Ademais, a Xunta de Goberno iniciou o procedemento para adxudicar o servizo de desratización, cun tipo de licitación de 23.916,28 euros/ano + IVE, e iniciouse a tramitación para adxudicar varios cursos de formación dirixidos ao Servizo de Extinción de Incendios e Salvamento.
