Compostela, 23 de xuño do 2022 – O persoal dos Centros Socioculturais de Compostela cumpre dez días de folga e denuncia o aprazamento por parte do concello da segunda xuntanza co comité que estaba prevista para hoxe.
O persoal dos Centros Socioculturais acusa ao equipo de goberno de falta de transparencia xa que “tras acabar a fase de alegacións para a licitación do lote IV, non atopamos nada, absolutamente, na Plataforma de contratación pública que nos poida esclarecer, minimamente, como se desenvolve o proceso”.
Desde o comité explican que foron 3 as empresas que se presentaron á oferta deserta, Serviplus (adxudicataria do lote I), Hyliacon e Move proyectos e inversiones, mais que esa é a única información que teñen “a 10 días de entrar as novas empresas adxudicatarias e a menos dun mes de entrar a empresa do Lote IV”.
O comité pregúntase que pasa en contratación e “porque nos negan o acceso a información básica e non confidencial”. Cuestiónanse se a contratación “é un servizo da cidadanía ou un servizo do alcalde” e avanzan que esta folga “non quedará aquí”.
Advirten ademais que de non ter solucións antes do día 1 de xullo, de non haber achegamento os centros, “desta vez si, pecharanse totalmente no mes de xullo para a conciliación de verán”.
Denuncian que “xogar cos postos de traballo e co futuro das persoas que manteñen este servizo vivo todo o ano non é unha broma” e aseguran que serán “contundentes”, porque “niso vai o noso futuro, e non temos nada que perder”.
