Compostela, 22 de xullo do 2020 – A pandemia acabou con moitas festas pero non será un obstáculo para que o Apóstolo teña o tradicional Día do Traxe.
O concelleiro de Festas, Gonzalo Muíños, foi o encargado de presentar as actividades da cuadraxésima edición do Día do Traxe que se celebrará este xoves 23.
O concelleiro explicou que “pensamos que esta cita debía manterse no programa das festas, porque sempre é un día moi agardado por moitas persoas e porque vimos que se podía celebrar, mantendo os protocolos de seguridade, dun xeito diferente, máis acoutado, pero que se podía celebrar”. De todos xeitos este ano non haberá o concurso de traxes, pero mantense o desfile, e a recepción en Raxoi, aínda que neste caso cun grupo reducido de persoas.
Xunto a Muiños estiveron na rolda de prensa a presidenta da Asociación do Traxe Galego, Pilar Astray, e pola secretaria da entidade, Carmen Guitián.Tal como explicou Pilar Astray, a xornada arrincará ás 11:30 horas coa concentración na Alameda, dende onde sairá o desfile, que pasará por Porta Faxeira , rúa do Vilar, Praterías, Conga, Antealtares, Preguntoiro, Cervantes e Acibechería, ata a igrexa de San Paio de Antealtares. Aquí celebrarase unha misa (13:00 h) e logo, ás 14:15 h, unha pequena representación da xunta directiva da Asociación do Traxe Galego será recibida no Concello pola Corporación municipal.