Compostela, 7 de novembro do 2022 – Unha esquela nunha para de autobús en Santiago daba conta, con moita sorna, dos pasamentos dos autobuses urbanos despois de que o venres ardera un en San Marcos.
A esquela comeza con habitual “o autobús nº 6 finou o día 4 de novembro, aos 17 anos de idade… D.E.P”. A continuación na nota pódese ler a “familia” do falecido “o seu esposo: liña 1, os seus fillos: liña 6 (falecida) liña 8 (falecida)..” un xeito retranqueiro de lembrar o mal estado no que se atopan os urbanos da cidade.
Queixas da oposición
Tras o suceso de agosto, coa desgraciada morte dun bombeiro, que outro autobús ardera o pasado venres levantou críticas de todos os grupos da oposición municipal. PP, CA e BNG solicitaron unha convocatoria extraordinaria do Consello de administración de Tussa para demandar a urxente revisión dos autobuses.
O Partido Popular pedía en nota de prensa que os vehículos non saíran á rúa sen unha auditoría e o voceiro, José Antonio Constenla, engadía que “a situación actual é totalmente inadmisible tanto polo perigo que supón para os usuarios, vehículos que transitan nas inmediacións e peóns, como pola deplorable imaxe que se está dando”.
Compostela Aberta incidía en que a situación non pode esperar a un novo contrato. A voceira, María Rozas, pedíalle ao alcalde “que adopte medidas con carácter urxente, porque o servizo de transporte atópase a día de hoxe unha situación de extrema gravidade que se debe resolver de inmediato, e que non pode agardar a un novo contrato que Bugallo non foi quen aínda de sacar a licitación”.
O BNG pola súa banda lembra que no último pleno levou unha iniciativa sobre este mesmo tema que non foi tida en conta. A voceira nacionalista, Goretti Sanmartín, dicía que “Día si e día tamén vemos como os autobuses teñen numerosas deficiencias e acaban avariados fumegando nas cunetas, o que provoca inseguranza, atrasos e malestar entre a veciñanza xa que non prestan a súa función nas condicións de calidade que lle corresponden”.
Unha situación complicada polo custo de renovar a flota pero que se consolida como unha prioridade.