Compostela, 14 de febreiro do 2024 – Á espera da queima do Meco esta tarde a cita do martes de Entroido conquistou as rúas de Compostela cunha nutrida presenza de público en todo o percorrido.
Colexios, asociacións, particulares, barrios… o desfile de Entroido en Compostela formouse a partir da propia cidade nas súas diversas formas. Desde os rapaces de Aspas ata lugares como Laraño ou Conxo; desde colexios como a Inmaculada ata particulares cos cativos.
Camiñando polo desfile un podía atoparse unha soprano deitada sobre un piano, a gaiola dun circo cos seus tigres, os súper heroes máis coñecidos, arañas ou un cortexo fúnebre cun enfermo de lepra. A imaxinación tomo o ensanche compostelán e a música marcou o paso xa que a maioría das carrozas e comparsas levaban a súa propia ambientación.
As “Festas do Apóstolo anos 60” foron os grandes gañadores tanto en comparsas como en carrozas. Unha nora que se movía e unha catedral na que as torres subían e baixaban foron a proposta dos gañadores.
“Exoplaneta Conxo K2-18B” e as “Escolas da Inmaculada” levaron o segundo e terceiro premio en comparsas. “Mar de Heroes” e “En el País de las Maravillas” foron os que conseguiron eses mesmos postos no apartado de carrozas, esta última conseguiu ademais o primeiro posto na categor´´ia de comparsas das parroquias e barrios de Santiago. En este apartado local A Ruliña de Laraño e a Troglofesta levaron o segundo e terceiro premio.
“Recordos da miña infancia para a miña neta” levou o premio á mellor parella. No caso dos grupos “Dando a nota” levou o primeiro posto, “As arañas do monte Viso” o segundo e “O noso mar” o terceiro.
Os individuais foron para “O regreso dos dinasaurios”, para Begoña Moreira e para “Alegria”.
A partir das oito de esta tarde o Meco baixará de Bendaña e será conducido ata a Praza Roxa para ser queimado, prégase asistir de riguroso loito para rematar o Entroido.
