Compostela, 2 de outubro do 2019 – Nova xornada de Curtocircuíto tras a preestrea de O que Arde, en ela os actores Amador e Benedicta acapararon todos os aplausos. Hoxe será a quenda do austriaco Peter Tscherkassky.
O cineasta austríaco Peter Tscherkassky presentará, no Teatro Principal ás 12h15, a primeira das sesións da retrospectiva que o festival lle dedica nesta edición. Nela, poderán verse os filmes Erotique, Urlaubsfilm, tabula rasa, Manufraktur, L’Arrivée, Outer Space, Dream Work, e The Exquisite Corpus. Curtocircuíto ofreceralle deste xeito ao público a oportunidade de gozar en pantalla grande dunha das filmografías máis controvertidas, elocuentes e transgresoras do cinema actual.
O resto da xornada
A xornada do mércores comezará un día máis en Curtocircuíto con Teenage Riot e Criaturas, as sesións que o festival programa para escolares de entre 6 e 18 anos. Ás 11h30 terá lugar a segunda sesión do Obradoiro para institutos impartido por Javier García, ´Montaxe e narrativa audiovisual´ na Biblioteca Ánxel Casal.
Xa pola tarde, no Teatro Principal da cidade acollerá ás 18h30 a terceira sesión de Explora cos filmes Color-blind, de Ben Russell; Momentum 115811, de Manuel Knapp; e Gulyabani, de Gürcan Keltek. Ás 19h00 o Salón Teatro encherase do audiovisual emerxente máis prometedor do país con Supernova. Dez novas voces conforman esta sección na que se proxectarán Hoy no va a llover, de Lautaro Herrera Batallán; O que precede a caída é branco, de Aldara Pagán; O que medra por dentro, de Nacho Ozores; A ninguna parte, de Pedro Vilas; 1 de 8.000, de Marta Valverde; Casting, de Lucía Estévez; O Enterrador Bejins, de Alejandro Sixto García; La magdalena de Proust, de Adela Dávila; Stockroom, de Sol Mussa e A typical morning, de Arancha Brandón.
O audiovisual galego volverá ser un dos grandes protagonistas da xornada na sesión Planeta GZ 2, que dará comezo ás 22h30 tamén no no Teatro Principal. Nun contexto no que a creación cinematográfica galega vive un dos seus momentos de maior relevancia internacional, o festival quere visibilizar nesta sección a riqueza e variedade do cinema galego actual, con estéticas, temáticas, xéneros e mesmo procedencias ben diferentes. Desta vez será a quenda de Arrolo, de Lucía Estévez; 16 de decembro, de Álvaro Gago; Os prexuízos da auga, de Santos Díaz; En la boca de la mina, de Brandán Cerviño; e Limbo, de Dani Viqueira
A xornada finalizará en Numax coa sesión especial Kevin B. Lee ft. Harun Farocki. Durante a súa labor como primeiro artista residente do recentemente creado Instituto Harun Farocki en Berlín, Kevin B. Lee produciu unha serie de videoensaios sobre Farocki para o Instituto Goethe. Os videoensaios que se amosarán nesta sesión adoptan a propia estratexia de Farocki de “imaxes estudando imaxes” para explorar a formidable obra do artista, aplicando fórmulas innovadoras como o documental de escritorio (desktop documentary) e a lexicografía videográfica.
Preestrea de O que arde
A de onte foi unha noite moi especial na que o director de O que arde, Oliver Laxe, volvía a que é sen duda unha das súas casas (porque Cannes comeza a ser a outra).
Pela del Álamo, esquerda, e Oliver Laxe en Curtocircuíto
O alcalde de Santiago, Xosé Sánchez Bugallo, lembraba que no 2010 Cineuropa xa premiara a Laxe polo que resultaba moi satisfactorio ver como o director crecía como cineasta e seguía acaparando premios.
O presidente da Xunta, Alberto Núñez Feijoo, destacaba tamén a importancia do traballo de Oliver á hora de espallar a marca Galicia polo mundo.
Pela del Álamo, director de Curtocircuíto, agradecía a implicación de todo o equipo de O que arde cando lles propuxo facer a preestrea no festival.
Pola súa banda Oliver Laxe falaba na súa intervención da importancia que ten na arte a mestura, a posibilidade de que todo o mundo acceda ao traballo que el fai
A anécdota a protagonizou Benedicta. Tras a intervención de Pela del Álamo fixo intención de ir ao micrófono para falar pensando que era a súa quenda. Pela pediulle con todo o cariño que agardara xa que era a queda das autoridades e do director. O presidente da Xunta, Alberto Núñez Feijoo, pechou as intervencións pero decidiu deixar o seu último minuto e medio para Benedicta aínda que non estaba previsto o que foi aplaudido e meteu a actriz nun compromiso que resolveu recibindo todo o cariño do público.
Oliver Laxe, Amador e Benedicta en Curtociruíto
Tras a película un interesante coloquio puxo fin, xa de madrugada, a unha preestrea moi emotiva dunha película de obrigada visión. As idílicas paisaxes de Navia de Suarna mestúranse coa dureza de ver un incendio en primeira fila. De fondo o amor nas súas diversas facianas. Un filme que días despois o espectador seguirá lembrando.
