Compostela, 8 de agosto do 2019 – Fora unha das teimas do anterior alcalde, Martiño Noriega, e agora o Ministerio para a Transición Ecolóxica comprometese a realizar os trámites necesarios para o inicio das obras da EDAR da Silvouta a principios de 2022.
Estas datas permitirían que a EDAR da Silvouta accedera aos fondos europeos comprometidos. Si se conseguira demostraría que o anterior equipo de goberno tiña razón nos seus cálculos pese as negativas reiteradas da oposición por aquel entón.
Reunión en Madrid
O actual alcalde, Xosé Sánchez Bugallo, reuniuse en Madrid co secretario de Estado de Medio Ambiente en funcións, Hugo Morán. O compromiso do organismo, sinalou o rexedor, é realizar “todos os trámites necesarios para que as obras da EDAR da Silvouta poidan comezar a principios do 2022” e poder así aproveitar os fondos europeos concedidos nesta etapa.
Co encontro complétase, segundo explicou Sánchez Bugallo, “o ciclo de reunións orientadas a impulsar de forma decisiva a construción da EDAR da Silvouta”, despois das xuntanzas mantidas coa conselleira de Infraestruturas, Ethel Vázquez, e coa directora de ACUAES, Rosa Cobo, na que tamén estiveron presentes técnicos da Consellería de Medio Ambiente.
O 30 de setembro, as nove empresas que se presentaron ao procedemento de concorrencia competitiva deberán presentar as propostas técnicas. E antes de final de final de ano, explicou Sánchez Bugallo, “ACUAES, en colaboración coa Xunta e co Concello, seleccionará as catro que considere máis axeitadas para que presenten o seu proxecto antes do verán do 2020”.
A continuación, unha vez seleccionado o proxecto técnico, hai que realizar, afirmou Sánchez Bugallo, “o trámite medioambiental”. Todas as administracións comparten, segundo confirmou, que este procedemento para a autorización medioambiental debería ser simplificado, “pero ata que non teñamos o proxecto técnico non se poderá dar resposta a esta cuestión”. Engadiu o rexedor que “procuraremos que sexa simplificado”, traballando con ese obxectivo, porque a finalidade “é que as obras estean comezadas en xaneiro de 2022, o que permitiría seguir contando cos fondos europeos para o seu financiamento”.