Compostela buscará a creación dunha comisión de seguimento sobre a Canteira de Miramontes

Compostela, 1 de decembro do 2017 – O goberno de Compostela buscará a creación dunha comisión de seguimento sobre a vella Canteira de Miramontes despois de que unha auditoría desvelara abundantes incumprimentos medioambientáis.

Tal e como se pode ler na web da Plataforma veciñal, no ano 2008 comezou un proxecto nos terreos da antiga Canteira de Miramontes en Grixoa. A finalidade era a recuperación medioambiental ao tempo que se lle sacaba rendemento ao espazo cun vertedoiro e unha planta de elaboración de solos artificiais. Co paso do tempo a Canteira de Miramontes converteuse nunha zona con cheiros, unha enorme colonia de gaivotas, residuos de todo tipo e nun claro perigo medioambiental.

Algunhas das deficiencias denunciadas pola plataforma son:

• Falta de valado perimetral que impida o acceso ao recinto, co conseguinte perigo para calquera persoa ou animal que se achegue.
• 

  Imaxes da Plataforma contra o vertedoiro de miramontes

  Ausencia de redes que impidan a entrada de aves de gran tamaño no vertedoiro. Proliferación de gaivotas.

• Acopios de tecnosolos que zumegan líquidos directamente sobre o terreo.
• Aplicación de tecnosolos en pendente e en capas de varios metros de altitude, cando a capa non podería superar os 80 centímetros.
• Balsa de tecnosolos en maduración: segundo a autorización de tecnosolos, a maduración ten que facerse sobre unha placa de formigón, non directamente sobre o terreo, como está a acontecer.
• Tecnosolos mal feitos con gran cantidade de pilas, plásticos, ósos, compresas… que producen vertidos cara a ladeira. Unha mostra tomada por unha auditoría externa do Concello revelou valores alarmantes de hidrocarburos e varios metais pesados, que superaban amplamente os límites permitidos.

O concelleiro de Medio Ambiente e Convivencia, Xan Duro, compareceu en rolda de prensa para reclamar a creación dunha comisión de seguimento da que formen parte a Xunta, o Concello, a veciñanza e a empresa explotadora das instalacións. A maiores, o edil adiantou que o alcalde ten solicitada unha reunión coa conselleira de Medio Ambiente, Beatriz Mato, para abordar a problemática ambiental do complexo “ante a falta de respostas por parte da Dirección Xeral de Calidade e Avaliación Ambiental ás comunicacións formuladas desde o pasado mes de setembro”.

O concelleiro de Medio Ambiente e Convivencia explicou que o Concello remitiulle á Dirección Xeral de Calidade Ambiental os dous informes encargados polo Goberno sobre a situación de Miramontes. Xan Duro relatou que non houbo respostas e denunciou “que o departamento autonómico tampouco respondeu ás solicitudes de información formuladas polos autores do informe externo encargado polo executivo municipal, tal e como eles fan constar no documento”.

O edil explicou que ese informe externo recomenda a creación dunha comisión de seguimento “que a veciñanza da parroquia de Grixoa considera tamén moi necesaria”.

Afeccións ambientais

Os dous informes encargados polo Goberno, un asinado por técnicos municipais e o outro por tres enxeñeiros externos, coincide nas afeccións ambientais da canteira de Miramontes.

O informe externo, máis completo e actualizado, fala de importantes deficiencias como “os malos cheiros provenientes do depósito da canteira, pero tamén do tráfico de camións, a superpoboación de gaivotas, a ausencia dun peche perimetral nas instalacións e o arrastre de lixiviados cara o exterior”

Xan Duro explicou que o propio informe propón algunhas medidas a adoptar para paliar as deficiencias. En canto aos olores, “o primeiro debe ser realizar un estudo olfatométrico rigoroso, que permita definir as actuacións necesarias para eliminar as molestias á veciñanza”. Tamén se aposta pola implantación dunha barreira vexetal nas instalacións, a desgasificación activa do vertedoiro e o control da poboación de gaivotas. O informe dos expertos sinala que tamén é preciso que “o almacenamento dos residuos se realice nunha zona impermeable e cuberta, e non a ceo aberto como na actualidade”.