Compostela, 23 de maio do 2022 – As condicións meteorolóxicas previstas para este domingo obrigaron ao traslado da Festa do Banquete de Conxo para o vindeiro domingo día 29.
Tanto o venres co banquete pequeno como o sábado co Mercado do Libro e da Artesanía na praza Aurelio Aguirre de Conxo e distintas actividades na Carballeira mantivéronse.
As actividades que quedan aprazadas son as seguintes: as recreacións teatrais “Alá van estudantes e artesáns”, “Baixamos ao bosque do Banquete” e o “Banquete de Conxo”; o pregón da Festa; o concerto da Banda Municipal de Música de Santiago; o xantar e romaría popular; o Serán da Fraternidade; as actuacións musicais e os discursos de despedida
Banquete pequeno
Si se puido celebrar o chamado banquete Pequeno. Unha representación teatral por parte do alumnado do CEIP Quiroga Palacios, o IES Arcebispo Xelmírez II e o CPR Santa Apolonia, e que contou coa visita do alcalde Xosé Sánchez Bugallo.
Tamén se celebrou o 3º Mercado do Libro e da Artesanía. Baixo a organización do Departamento de Comercio do Concello, este espazo acolleu 20 expositores dos sectores do libro e da artesanía así como mostras de xogos populares, presentacións de libros, recitais poéticos, chocolata e as actuacións musicais de Los jinetes del Trópico, Mamá Cabra, Momboi ou Os d’abaixo.
