Compostela, 26 de xullo do 2023 – Alba de Compostela encheu o Teatro Principal que acolleu a veciños e persoeiros mesmo na última bancada, a máis próxima ao ceo.
Con unha ampla e sonora salva de aplausos foron recibidos os homenaxeados no escenario, acompañados pola alcaldesa, Goretti Sanmartín. Un vídeo lembrou boa parte daquela Alba de Gloria que hai 75 anos lía Castelao na Arxentina.
Un Alba de Compostela que rendeu homenaxe a “persoas e colectivos que desde o abrente ao solpor, cada día, fan que este concello camiñe cara a adiante”, como sinalou a alcaldesa no seu discurso.
Daniel Lorenzo Santos director da Fundación Catedral de Santiago; os equipos femininos do Hóckey Club Raxoi; Mª Rosa Álvarez Prada, decana do Colexio Oficial de Psicoloxía de Galicia e directora técnica do Plan Socio-Comunitario de Vite; e Ánxeles González Porto, propietaria do pub Borriquita de Belém e membro da Asociación Cultural Cidade Vella, recibiron este recoñecemento de man da rexedora .
A figura entregada está tamén chea de simbolismo. Un disco de prata que representa á lua. En el pódese ver a constelación Canis Majoris, todo asentado sobre unha base de madeira queimada que representa á noite. Unha peza que leva o nome de Constellatio.
Tras a entrega dos galardóns chegou o momento do discurso da alcaldesa quen comezou lembrando aquela Alba de Castelao de hai 75 anos “No Concello de Santiago queremos hoxe conmemorar un texto, un magnífico texto. E un momento, aquel 25 de xullo de 1948, cando Castelao, en Bos Aires, nos deixou unha lección de vida, unha lección de amor á nosa historia, a quen somos e, tamén, un testamento para construírmos o futuro, con trabes sólidas, cun encofrado de ferro, para fortalecer a estrutura, que non debe caer nunca”.
A rexedora recordou que Alba de Compostela “nace para conmemorar Castelao, o seu inmortal discurso mais tamén, ben o saben, para festexarmos mulleres e homes do noso tempo que constrúen Compostela, que fan que este concello sexa aínda máis grande, unha realidade colectiva, unha cidade histórica cun futuro tecido por moitas mans, moitas cabezas e moitos corazóns”.
Ao respecto das persoas e entidades homexeadas, Goretti Sanmartín quixo recoñecer o “traballo e o compromiso co noso concello, de homes, mulleres e entidades que, co seu esforzo, coa súa intelixencia e a súa enerxía fan que a colectividade dea pasos adiante, avance como un todo, con orgullo e con esperanza”.
“Coa Alba de Compostela queremos, en boa maneira, mostrar o orgullo do que somos, o orgullo de persoas e colectivos que desde o abrente ao solpor, cada día, fan que este concello camiñe cara a adiante, con decisión, de mans dadas, sabéndose partícipes dun proxecto que non é de ninguén senón de todos nós, de todas nós, e que responde ao nome de Santiago de Compostela”.
O acto pechouse co himno de Galicia, interpretado por Oli Xiráldez, na gaita, e Fernando Estévez, ao tambor, acompañados por todos os asistentes.
