Compostela, 19 de xaneiro do 2024 – O concello de Santiago destina 40.000 euros a melloras no refuxio de animais de Bando ademais de planificar campañas de sensibilización.
O refuxio de Bando acolle tamén a animais de concellos limítrofes e no pasado ano viviu un importante incremento na entrada de cans e gatos. So en xuño chegaron ao refuxio 169 animais. Na actualidade as instalacións acollen a 270 cans e 270 gatos, dos que 82 están en casas de acollida temporal.
A intervención que se está a realizar consiste na construción de tres novos parques de recreo para cans e dous novos patios para os gatos; o arranxo de portas; a habilitación de catro canís para animais maiores, enfermos e cachorros así como diversas reparacións de mantemento.
O concelleiro de Dereitos dos Animais, Xesús Domínguez, fixo un chamamento á implicación de todas as administracións que integran o Refuxio de Bando, “tanto na achega de recursos humanos como económicos, para facer sustentable a xestión destas instalacións e do servizo que prestan para o coidado dos animais”.
Xesús Domínguez sinalou que tanto a dirección do Refuxio como o propio Concello están facendo xestións para procurar a colaboración con outras entidades e empresas do sector, como farmacias e clínicas veterinarias, para buscar sinerxías e facilitar a súa contribución a mellorar a situación actual.
“Insistimos na necesidade de concienciar a veciñanza para evitar o abandono de animais e tamén en dar a coñecer que as persoas que queiran adoptar un can ou un gato poden acudir ao Refuxio de Animais de Bando ou pórse en contacto a través da información que figura na súa páxina web, onde están as fichas con fotos e características dos animais para a súa adopción”, engadiu o concelleiro.