Ordes, 17 de xaneiro do 2017 (fonte BNG Ordes) – O BNG de Ordes ven de propoñer que o concello leve a cabo os trámites precisos para elaborar e aprobar unha ordenanza fiscal para cobrarlle a correspondente taxa ás empresas titulares das instalacións de enerxía eléctrica, gas ou hidrocarburos; pola utilización ou aproveitamento do dominio público local.
O voceiro nacionalista, Pablo Vidal sinala que “esta proposta ven avalada por diversas sentenzas do Tribunal Supremo, nas que se permite aos concellos considerar como construcións as liñas eléctricas e as conducións de gas e hidrocarburos”.
Os nacionalistas tamén propoñen que o recadado por este concepto, sexa empregado para baixar outros impostos municipais á veciñanza, como poden ser o IBI ou o ICIO.
Problemas de suministro
O BNG de Ordes tamén insta nunha moción a que a Consellería de Economía, Emprego e Industria salvagarde os intereses da veciñanza de Ordes perante os continuos problemas que sofre no subministro eléctrico.
O voceiro nacionalista, Pablo Vidal manifesta que “no 2016 tiveron lugar múltiples apagóns varios con duración prolongada, situación que novamente se repite neste comezo de ano”.
Segundo Vidal “non é comprensible esta problemática dada a situación privilexiada de Ordes de cara á subministración de enerxía eléctrica, a carón da central térmica de Meirama”.