Bisbarra, 28 de maio do 2023 – Ángel Bernardo Tahoces, ex-director xeral de Planificación Enerxética e Recursos Naturais da Xunta, terá que declarar no xulgado por irregularidades relacionadas coa mina de San Finx.
O Xulgado de Instrución número 3 de Santiago cita a Tahoces como imputado acusado de varios delitos de falsidade documental relativos ás minas de San Finx, en Lousame. No mesmo auto chámase aos outros imputados no caso, o xefe do servizo de enerxía e minas na Coruña e un dos funcionarios do mesmo departamento.
Todos eles terán que presentarse no xulgado de Santiago o 21 de setembro por unha causa penal na que están persoadas como acusación popular a Confradía de Pescadores de Noia, Ecoloxistas en Acción e Verdegaia. Estes colectivos denunciaran que informes asinados por Ángel Bernardo Tahoces contiñan información falsa sobre diversos aspectos da mina de San Finx.
Segundo os denunciantes os informes “pretendían beneficiar á empresa concesionaria tentando facer pasar a presa de residuos mineiros de San Finx como parte das instalacións dunha central hidroeléctrica inexistente e, un ano máis tarde, relacionándoa cun muíño de millo”.
Os colectivos lembran no seu escrito ao xulgado que a presa de formigón, de 50 metros de largo e 14 de alto, construída pola empresa mineira en 1939 como depósito de lodos, apareceu nos plans oficiais de labores ata que se deixaron de presentar no ano 2000.
Augas de Galicia recoñeceu que en caso de colapso os residuos mineiros almacenados causarían un importante impacto ambiental augas abaixo, estando a tan só 7 km da ría de Noia. Evitando recoñecer que se trataba dunha presa de residuos mineiros os imputados presuntamente terían tentado evitar as responsabilidades da empresa concesionaria, que tería que facer fronte a unha restauración valorada en varios millóns de euros, e danos multimillonarios en caso de colapso e afectación ás zonas de marisqueo na ría.
Os mesmos funcionarios e alto cargo “tentaron ocultar a existencia da contaminación con metais pesados, apoiando o argumento falso da empresa de que os altos niveis de elementos tóxicos eran orixinais, e insistiron unha e outra vez que non era necesario someter o proxecto a unha avaliación de impacto ambiental, algo que a propia Xunta acabou recoñecendo que era imprescindible para a continuidade da explotación”.
Este non é a única causa penal que afecta as minas de San Finx, unha vez que en paralelo a Confradía de Noia está igualmente persoada como acusación popular noutra causa dos xulgados de Santiago contra catro funcionarios e altos cargos de Augas de Galicia por malversación, prevaricación e falsidade, así como nun proceso por delitos medioambientais que se instrúe nos xulgados de Noia contra a empresa mineira e os seus directivos australianos.
